بەڕێوەبەرایەتیی پاسپۆرتی سلێمانی ڕایگەیاند، لە ئەمڕۆ پێنجشەممە ١ی کانوونی دووەمی ٢٠٢٦ـەوە سیستەمی سەرەی ئەلیکترۆنی بۆ دەرهێنان و نوێکردنەوەی پاسپۆرت کارا کراوە و هاووڵاتییان دەتوانن لە ڕێگەی سکانکردنی کۆدی (QR) یان ماڵپەڕی تایبەتەوە نۆرە بگرن. ئامانجی ئەم هەنگاوە ڕێکخستنی مامەڵەکان و کەمکردنەوەی تێچووی سەرشانێ هاووڵاتییانە.
جیاوازیی نرخەکان و هۆشداری
بەپێی ڕاگەیەندراوەکەی پاسپۆرتی سلێمانی، جیاوازییەکی بەرچاو لە تێچووی پاسپۆرتدا هەیە لە نێوان ئەوانەی سەرەی ئەلیکترۆنییان هەیە و ئەوانەی ڕاستەوخۆ سەردان دەکەن:
بە سەرەی ئەلیکترۆنی (حجز): تێچووی پاسپۆرتەکە تەنها ٩١ هەزار دینارە.
بەبێ سەرەی ئەلیکترۆنی: پێویستە هاووڵاتی بڕی ١٠٠ هەزار دینار رسووماتی زیادە بدات، کە لەگەڵ تێچووی ئەسڵییەکەدا کۆی گشتی دەکاتە ١٩١ هەزار دینار.
کاتی سەردانیکردن و بەڵگەنامەکان
بەڕێوەبەرایەتییەکە داوا لە هاووڵاتییان دەکات پابەندی ئەو کاتە بن کە لە ڕێگەی نامەی ئەلیکترۆنییەوە بۆیان دیاری دەکرێت. هەروەها ئاگادارییەکی تایبەتی بۆ ئەو کەسانە بڵاوکردەوە کە کاتی سەرەکەیان دەکەوێتە کاتژمێر ١٢:٠٠ی نیوەڕۆ یان ١:٠٠ی پاشنیوەڕۆ؛ ئەم هاووڵاتییانە پێویستە کاتژمێر ١١:٠٠ی پێشنیوەڕۆ لە ناو بەڕێوەبەرایەتییەکە ئامادە بن بۆ ڕاییکردنی مامەڵەکانیان.
جەختیش کراوەتەوە کە بۆ ڕاییکردنی مامەڵەکان تەنها کار بە «کارتی نیشتمانیی ڕەسەن (ئەسڵی)» دەکرێت و پێویستە هاووڵاتییان لەگەڵ خۆیان بیبەن.