تەرمی شەهید (ئەحمەد هێمن)، ئەو گەنجە کەرکووکییەی کە بۆ بەرگری لە ڕۆژئاوای کوردستان رووی لەو بەشەی نیشتمان کردبوو، دوای ئەوەی بە ڕێوڕەسمی شکۆدار لە شارەکانی قامیشلۆ، دهۆک و هەولێر بەڕێ کرا، گەیشتەوە زێدی خۆی و لەناو ئاپۆڕایەکی جەماوەریی بێوێنەدا لە گۆڕستانی ڕەحیماوەی کەرکووک بەخاک سپێردرا. ڕێبوار تەها، پارێزگاری کەرکووک لە میانی بەشداریکردنی لە مەراسیمەکەدا ڕایگەیاند، کۆچی دوایی و شەهیدبوونی ئەحمەد «مردنی شەرەفە» و جێگەی شانازییە بۆ هەموو کەرکووک.

گەڕانەوەی «زاوا»ی خوێناوی

ئەحمەد هێمن عومەر، گەنجێکی تەمەن ٢٣ ساڵی دانیشتووی گەڕەکی ڕەحیماوە بوو کە هێشتا ژیانی هاوسەریی پێکنەهێنابوو. لە ٢٧ی کانوونی دووەمی ٢٠٢٦ لە حەسەکە بەهۆی هێرشی درۆنێکی خۆکوژەوە شەهید بوو. لە کاتی گەیشتنەوەی تەرمەکەی بۆ بەردەم هۆڵی «کاکەڕەش» کە پرسەکەی تێدا دانراوە، دیمەنێکی سۆزداریی لێ کەوتەوە؛ شکۆفە محەمەد، چالاکوانی مەدەنی بە سینییەک چێکڵێت و تارایەکی سوورەوە پێشوازی لێ کرد و گوتی: «شەهید ئەحمەد ژنی نەهێنابوو، بۆیە وەک زاوایەک بەڕێی دەکەین».

تابووتێک بۆ سیمبولی ناڕەزایەتی

لە پێشهاتێکی دەگمەندا، چالاکوانانی مەدەنیی کەرکووک بڕیاریاندا ئەو تابووتەی تەرمی شەهید ئەحمەدی پێ هێنراوەتەوە، نەفەوتێنن و نەخرێتە ژێر خاک. نەبەرد کاکەیی، چالاکوانی مەدەنی ڕایگەیاند کە لەسەر داوای کەسوکاری شەهید، بڕیاردراوە تابووتەکە بکرێتە «سیمبولی خۆپیشاندانەکانی کەرکووک» بۆ پشتیوانی لە ڕۆژئاوا و ئاڵایەکی کوردستانی تێدا دانراوە وەک گوزارشتێک بۆ ئەو پەیامەی شەهید لەپێناویدا گیانی بەخت کرد.

هونەر و ئاڵا لە خزمەت نیشتمان

کاریگەریی شەهیدبوونی ئەحمەد هێمن ڕەنگدانەوەی گەورەی لەسەر شەقامی کوردی دروستکردووە:

• دروستکردنی دوو پەیکەر: هونەرمەند سامان ئەبوبەکر، خاوەنی ٤٠ ساڵ ئەزموون، ڕایگەیاند بەخۆڕایی پەیکەرێک بۆ شەهید بە جلی پێشمەرگە و ئاڵای کوردستانەوە دروست دەکات. هاوکات دامەزراوەی «کەریمی عەلەکە»ش پەیکەرێکی دیکە وەک سیمبولی یەکڕیزی لە شارەکە دادەنێن.

• هەڵکشانی بازاڕی ئاڵا: عومەر زۆرباش، سەرۆکی کۆمەڵەی چاپخانەکانی هەرێمی کوردستان ئاشکرای کرد کە خواست لەسەر چاپکردنی ئاڵای کوردستان بە ڕێژەی ٣٠٪ زیادی کردووە. هاووڵاتییان داوای چاپکردنی ئاڵا دەکەن بە دروشمەکانی وەک «٢+٢=١» و «کوردستان یەک پارچەیە».

«کوڕی چوار پارچەی کوردستان»

بنەماڵەی شەهید ئەحمەد شانازی بە قوربانییەکەی کوڕەکەیانەوە دەکەن. جەمال حەداد، مامی شەهیدەکە گوتی: «شەهید ئەحمەد تەنها کوڕی ئێمە نییە، بەڵکو کوڕی هەر چوار پارچەی کوردستانە». عومەر ئەحمەد، باپیری شەهیدەکەش جەختی کردەوە: «سەربەرزین و شانازی پێوە دەکەین، ئێمە کوردایەتی دەکەین». هاوکات بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێکدا شەهید ئەحمەدی بە «سیمبولی یەکڕیزی» وەسف کرد.