ڕۆژنامەنووسی سزادراوی بادینان، شێروان شێروانی، لە ڕێگەی پارێزەرەکەیەوە پەیامێکی ئاڕاستەی ڕایگشتی کردووە و تێیدا پەردەی لەسەر دۆخی ژیان و گوزەرانی زیندانیانی چاکسازیی گەورانی هەولێر هەڵماڵیوە، کە بەدەست قەرەباڵغی و سەرماوە دەناڵێنن.

قەرەباڵغی و نەبوونی شوێنی پێویست

بەگوێرەی پەیامەکە، ژوورەکانی زیندان کە بۆ ١٠ کەس دروستکراون، ژمارەیەکی زۆر زیاتر لە توانای خۆیان تێدا جێگیر کراوە. شێروانی دەڵێت: «هەر ژوورێکی ١٠ کەسی لە ٢٥ تاوەکو ٣٠ کەسی سزادراو قەرەپەستکراوین، لەسەر مۆکێتێکی ڕەق لەم ساردی زستانە و لەم بەفرانبارەدا».

سەرما و نەبوونی خزمەتگوزاری

لەم وەرزە ساردەدا، زیندانییەکان ڕووبەڕووی گرفتێکی گەورە بوونەتەوە کە نەبوونی ئامێرەکانی گەرمکردنەوەیە. لە پەیامەکەدا هاتووە: «هەریەکەمان دوو بەتانی بێسپلێت و هەوای گەرم و بێئاوی گەرم، بێجگە لە چەند کاتژمێرێک لە هەفتەیەکدا ئاو گەرم دەبێت، بەڵام جاری واش هەیە سەرەت بەرناکەوێت و سارد دەبێتەوە».

ڕێگری لە پێداویستییە دەرەکییەکان

شێروان شێروانی ئاماژەی بەوەش کردووە کە ئیدارەی زیندان ڕێگە بە زیندانیان نادات خۆیان چارەسەر بۆ دۆخەکە بدۆزنەوە. ئەو نووسیویەتی: «ناهێڵن سۆبا یان هیتەر بۆخۆمان بکڕین، ڕێگەش نادەن لە دەرەوە بەتانیمان بۆ بێت». هەروەها گلەیی لە دابەشکردنی جلوبەرگ کردووە و دەڵێت: «جلی زستانەش لە چلەی هاویندا پێمان دەگات».

پاشخان

شێروان شێروانی لە تشرینی یەکەمی ساڵی ٢٠٢٠ دەستگیرکرا و لە شوباتی ٢٠٢١ لەگەڵ ژمارەیەک لە چالاکوانانی بادینان بە سزای شەش ساڵ زیندانی سزادرا. ناوبراو لە پەیامەکەیدا بە تەنزەوە ڕەخنەی لە بەڕێوەبەری چاکسازیی گرتووە و ئاماژەی بەوە کردووە کە ئەم دۆخە تەنها «مشتێکە لە خەرواری گرفتەکانی زیندانەکانی هەولێر».