بەهۆی هاتنی شەپۆلێکی بەفر و باران و نالەباریی کەشوهەوا، زانکۆی سۆران گۆڕانکاری لە شێوازی خوێندنی بەشێک لە قوتابیاندا کرد و کردییە ئۆنلاین، هاوکات زانکۆی سەڵاحەدین لە هەولێر کۆتاییهاتنی پشووەکانی ڕاگەیاند.
بڕیارەکەی زانکۆی سۆران
ئەنجومەنی زانکۆی سۆران بڕیاریدا بەهۆی دۆخی کەشوهەوا و لەپێناو پاراستنی سەلامەتیی قوتابیان، خوێندنی قۆناغى یەکەمی بەشە زانستییەکانی سەرجەم فاکەڵتییەکانی زانکۆکە بۆ ئەم هەفتەیە بکرێتە ئۆنلاین.
بەپێی بڕیارەکە، لە ڕۆژی ٣ی کانوونی دووەمی ٢٠٢٦ تاوەکو ٨ی کانوونی دووەمی ٢٠٢٦، خوێندن بۆ ئەو خوێندکارانە بە شێوەی ئۆنلاین دەبێت. زانکۆکە ڕوونیشیکردووەتەوە کە «بەشە زانستییەکانی سەرجەم فاکەڵتییەکان، کات و خشتەی بەڕێوەچوونی وانەکان بەگوێرەی ئەم پێشهاتە تازەیە ئامادە دەکەن و بۆ قوتابییان ڕەوانە دەکرێت».
شایەنی باسە، ئەم بڕیارە تەنها قوتابیان دەگرێتەوە و دەوامی کارگێری و فەرمانبەرانی زانکۆی سۆران بە شێوەی ئاسایی بەردەوام دەبێت.
دەستپێکردنەوەی دەوام لە زانکۆی سەڵاحەدین
لەلایەکی دیکەوە، بەڕێوەبەرایەتی ڕاگەیاندنی زانکۆی سەڵاحەدین سەرجەم قوتابیانی ئاگادار کردەوە کە پشووەکانی سەری ساڵ کۆتایی هاتووە.
سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین ڕایگەیاند: «ڕۆژی یەکشەممە ٤ی کانوونی دووەمی ٢٠٢٦ وەک یەکەم ڕۆژی دەوامی فەرمی دوای پشووەکان دیاریکراوە و هەموو ئامادەکارییەکی پێویست بۆ پێشوازیکردن لە قوتابییان ئەنجامدراوە».
ئەم گۆڕانکارییانە هاوکاتە لەگەڵ پێشبینییەکانی کەشناسی کە ئاماژە بە بەردەوامی بارانبارین لە سلێمانی و هەڵەبجە و بەفربارین لە ناوچە شاخاوییەکان و سنوورییەکان دەکەن.