نیوەڕۆی ئەمڕۆ شەممە، ٢٧ی کانوونی یەکەمی ٢٠٢٥، ڕووداوێکی کوشتن لە ناوجەرگەی بازاڕی شاری سلێمانی تۆمارکرا و تێیدا گەنجێکی خەڵکی باکووری کوردستان گیانی لەدەستدا.
بەپێی زانیارییەکان، تەرمی گەنجەکە لە نهۆمی چوارەمی هۆتێل (تاجی پاشا) لە نزیک مزگەوتی گەورەی سلێمانی دۆزراوەتەوە. سەرچاوەیەک لە سەنتەری ڕێکخستنی پەیوەندییەکان (JCC) پشتڕاستی کردەوە کە قوربانییەکە شوێنەواری چەقۆ بە جەستەیەوە بووە.
ناسنامە و وردەکاری ڕووداوەکە
قوربانییەکە گەنجێکی تەمەن نزیکەی ٢٥ بۆ ٣٠ ساڵە و خەڵکی باکووری کوردستانە. بەپێی زانیارییە سەرەتاییەکان، ناوبراو پیشەی وەستای دیکۆرات بووە و لەگەڵ براکەیدا لەو هۆتێلە نیشتەجێ بوون و مۆڵەتی مانەوەی فەرمییان هەبووە.
سەرچاوەیەکی ئەمنی ئاماژەی بەوە کردووە کە لێکۆڵینەوە سەرەتاییەکان دەریدەخەن ڕووداوەکە پەیوەندی بە بابەتی سیاسییەوە نییە، بەڵکو بەهۆی دروستبوونی شەڕ و دەمەقاڵێ بووە لەگەڵ هاوڕێیەکی خۆیدا و بەو هۆیەوە کوژراوە.
ڕێکارە یاساییەکان
دوای ئاگادارکردنەوەیان، تیمەکانی پۆلیس و بەڵگەی تاوان گەیشتوونەتە شوێنی ڕووداوەکە و تەرمەکە ڕەوانەی پزیشکی داد کراوە. هەرچەندە سەرەتا پۆلیس دەستی بە لێکۆڵینەوە کرد، بەڵام دواتر دۆسیەکە ڕادەستی ئاسایشی سلێمانی کراوە بۆ ئەنجامدانی لێکۆڵینەوەی وردتر و ئاشکراکردنی تەواوی وردەکارییەکان.