بەڕێوەبەرایەتی هاتوچۆی سلێمانی لە ڕاگەیەندراوێکدا بە فەرمی وادەی کاراکردنی کامێراکانی چاودێریی خێرایی لە جۆری «خاڵ بۆ خاڵ» لە چەند ڕێگایەکی ستراتیژیی سنوری پارێزگای سلێمانی و هەڵەبجە ڕاگەیاند.
بەگوێرەی بڕیارەکە، لە ڕۆژی پێنجشەممە ڕێکەوتی ٨ی کانوونی دووەمی ٢٠٢٦، کاتژمێر ١٢:٠٠ی نیوەڕۆ، کامێراکانی تۆمارکردنی تیژڕەوی لەم ڕێگایانە دەکەونە کار:
١. ڕێگای عەربەت – سەیدسادق – پارێزگای هەڵەبجە.
٢. ڕێگای پێنجوێن.
هاتوچۆی سلێمانی ڕوونیکردووەتەوە کە سیستەمەکە بەشێوەی «خاڵ بۆ خاڵ» (Point to Point) کار دەکات، واتە خێرایی ئۆتۆمبێل لە نێوان دوو کامێرادا هەژمار دەکرێت، نەک تەنها لە کاتی تێپەڕبوون بە بەردەم کامێرایەکدا. هەروەها جەخت کراوەتەوە کە کامێراکان هەردوو سایدی هاتن و ڕۆشتن دەگرنەوە.
لە ڕاگەیەندراوەکەدا ئاماژە بەوە دراوە کە لەپێناو بەرچاوڕوونی شۆفێران، لە قەراغی ڕێگاکاندا هێمای دیاریکردنی خێرایی پێویست دانراوە. هاتوچۆی سلێمانی داوا لە شۆفێران دەکات پابەندی خێراییە دیاریکراوەکان بن بۆ پاراستنی گیانی خۆیان و هاوڵاتییان لە ڕووداوی نەخوازراو و دووربوون لە سزای دارایی.
شایانی باسە، ئەمە یەکەمجار نییە سیستەمی خاڵ بۆ خاڵ لە سنوری پارێزگای سلێمانی بەکار دەهێنرێت؛ پێشتر لە ڕێگاکانی سلێمانی - دوکان، سلێمانی – چەمچەماڵ، سلێمانی - تاسڵوجە و ڕێگای سلێمانی بۆ شارەزوور کامێراکان دانرابوون و کەوتبوونە کار.