بەڕێوەبەرایەتیی هاتوچۆی سلێمانی لە هەنگاوێکی نوێدا بۆ کەمکردنەوەی قەرەباڵغی و ڕێکخستنی کاروباری هاووڵاتییان، سیستمی نۆرەگرتنی بۆ بەشی مۆڵەت کردە ئەلیکترۆنی و لەمەودوا پێویستە هاووڵاتییان پێشوەختە نۆرە بۆ سەردانیکردن بگرن.

بەپێی ڕاگەیەندراوی بەڕێوەبەرایەتییەکە، ئامانج لەم هەنگاوە «کەمکردنەوەی لۆد و قەرەباڵغی و ڕاییکردنی مامەڵەی هاووڵاتییانە بەشێوەیەکی سەردەمییانە». سیستمەکە هەفتانە تەنها یەک جار و لە ڕۆژانی شەممەدا کاتژمێر ٧:٠٠ـی ئێوارە چالاک دەبێت، کە تێیدا هاووڵاتی دەتوانێت ڕۆژێک لە هەفتەی داهاتوو بۆ سەردانیکردن دیاری بکات.

چۆنیەتی نۆرەگرتن و مەرجەکان

پرۆسەکە لەڕێگەی ماڵپەڕی فەرمی هاتوچۆی سلێمانییەوە ئەنجام دەدرێت. بۆ تۆمارکردنی ناو، پێویستە کەسی سەردانیکەر ناوی سیانی بە کوردی و ژمارەی مۆبایل بنووسێت، هەروەها لە هەنگاوێکی گرنگدا بۆ ڕێگری لە فرۆشتنەوەی نۆرە، سیستمەکە داوای وێنەی راستەوخۆی (Live) کەسی سەردانیکەر دەکات.

هاتوچۆی سلێمانی جەختی کردووەتەوە کە «سیستمەکە بە شێوەیەک بەرنامەڕێژی بۆ کراوە کە تەنیا ئەو کەسەی نۆرەکە دەگرێت دەتوانێت سەردان بکات، لەبەرئەوەی لە سیستمەکەدا تایبەتمەندیی ناسینەوەی کەسی هەیە». لە کۆتایی پرۆسەکەدا، فۆرمێک کە کۆدی (QR)ـی لەسەرە دەدرێت بە هاووڵاتی و پێویستە لە کاتی سەردانکردندا پێی بێت (بەشێوەی کاغەز یان وێنە لە موبایلەکەیدا) بۆ ئەوەی لەلایەن ئامێری خوێنەرەوە زانیارییەکانی پشتڕاست بکرێتەوە.

هەنگاوەکانی تۆمارکردن:

1. کردنەوەی ماڵپەڕی هاتوچۆی سلێمانی و هەڵبژاردنی بەشی “نۆرەگرتنی بەشی مۆڵەت”.

2. پڕکردنەوەی زانیارییە کەسییەکان و گرتنی وێنەی ڕاستەوخۆ.

3. دیاریکردنی ئەو ڕۆژەی کە دەتەوێت سەردانی بەڕێوەبەرایەتییەکە بکەیت.

4. وەرگرتنی فۆرمەکە و پاراستنی وێنەیەک لای خۆت.

   ئەم خزمەتگوزارییە سەرەتا بەشێوەی ئەزموونی جێبەجێ دەکرێت و هەر گۆڕانکارییەک ڕووبدات، لە ڕێگەی کەناڵە فەرمییەکانەوە هاووڵاتییان ئاگادار دەکرێنەوە.