بڕیارە سبەی شەممە (3-1-2026)، هەردوو حیزبە دەسەڵاتدارەکەی هەرێمی کوردستان لە هەولێر و سلێمانی کۆبوونەوەی یەکلاکەرەوە ئەنجام بدەن، ئەوەش بە مەبەستی دیاریکردنی کاندیدەکانیان بۆ پۆستی سەرۆک کۆماری عێراق بەر لە تەواوبوونی وادەی یاسایی.

جووڵەی پارتی لە پیرمام

بەپێی زانیارییەکان، مەکتەبی سیاسیی پارتی دیموکراتی کوردستان لە پیرمام بە سەرپەرشتیی سەرۆک مەسعود بارزانی و ئامادەبوونی نێچیرڤان بارزانی و مەسرور بارزانی کۆدەبێتەوە. تەوەرە سەرەکییەکانی ئەم کۆبوونەوەیە بریتی دەبن لە:

• یەکلاکردنەوەی کاندیدی سەرۆک کۆمار.

• تاوتوێکردنی پێکهێنانی کابینەی نوێی حکومەتی هەرێم و بەغدا.

• هەڵسەنگاندنی دۆخی هەڵبژاردنی دەستەی سەرۆکایەتیی پەرلەمانی عێراق.

  بەپێی سەرچاوە میدیاییەکان، ناوی هەریەک لە «ڕێبەر ئەحمەد» وەزیری ناوخۆی هەرێم و «فوئاد حوسێن» وەزیری دەرەوەی عێراق وەک بەهێزترین کاندیدەکانی پارتی بۆ ئەو پۆستە دەهێنرێن.

جووڵەی یەکێتی لە سلێمانی

هاوتەریب لەگەڵ کۆبوونەوەکەی هەولێر، مەکتەبی سیاسیی یەکێتیی نیشتمانیی کوردستان لە سلێمانی بە سەرپەرشتیی بافڵ تاڵەبانی کۆدەبێتەوە. سەرچاوەکان ئاماژە بەوە دەکەن کە کێبڕکێی ناوخۆی یەکێتی لە نێوان «نزار ئامێدی» و «خالید شوانی» چڕ بووەتەوە و بڕیارە لەو کۆبوونەوەیەدا پرسەکە یەکلا بکرێتەوە.

فشاری چوارچێوەی هەماهەنگی

لەلایەکی دیکەوە، سەرکردەکانی چوارچێوەی هەماهەنگی (شیعەکان)، بەتایبەت نوری مالیکی و هادی عامری، پەیامیان بۆ هەردوو حیزب ناردووە. بەپێی سەرچاوەکانی کەناڵی ئەلعەرەبییە، پەیامەکە ڕوونە: «پێویستە کورد کاندیدێک دیاری بکات کە جێگەی ڕەزامەندیی هەمووان بێت».

ئەم فشارەی بەغدا بۆ ئەوەیە سیناریۆی چەقبەستوویی سیاسی دووبارە نەبێتەوە، بەتایبەت کە پۆستی سەرۆک کۆمار کلیلی تێپەڕاندنی حکومەتی نوێی عێراقە.

ئۆپۆزیسیۆن و وادەی یاسایی

جگە لە دەسەڵات، هەریەک لە یەکگرتووی ئیسلامی، کۆمەڵ و ڕەوتی هەڵوێست لە گفتوگۆدان بۆ دیاریکردنی هەڵوێستێکی هاوبەش یان کاندیدێکی سەربەخۆ.

ڕۆژی دووشەممە (5-1-2026) دوا وادەیە بۆ پێشکەشکردنی ناوی کاندیدان بۆ پۆستی سەرۆک کۆمار، بۆیە کۆبوونەوەکانی سبەی شەممە بە هەنگاوی کۆتایی و یەکلاکەرەوە دادەنرێن.