بەهۆی شەپۆلێکی بەفربارینی چڕ کە ناوچەکانی دەڤەری پێنجوێنی گرتووەتەوە و دروستبوونی ئاستەنگی هاتووچۆ، بەڕێوەبەرایەتی هاتوچۆی قەزاکە بڕیاری داخستنی ڕێگای سەرەکی نێوان سلێمانی و پێنجوێنی دەرکرد.
بەڕێوەبەرایەتی هاتوچۆی پێنجوێن لە ڕاگەیەندراوێکدا ئاشکرایکردووە، بەهۆی زۆریی ڕێژەی بەفربارینەکەوە، بڕیاردراوە تاوەکو کاتژمێر ١:٠٠ی پاشنیوەڕۆی ئەمڕۆ هەینی (٢ی کانوونی دووەمی ٢٠٢٦)، ڕێگای نێوان پێنجوێن – سلێمانی بەتەواوی دابخرێت و هەموو جۆرە هاتووچۆیەک تێیدا ڕابگیرێت. بەپێی زانیارییەکان، داخستنەکە بە دیاریکراوی لە ناوچەی «ملەکە»وە دەستپێدەکات کە بەفری لێ کەڵەکە بووە.
هێمن ئیبراهیم، قایمقامی قەزای پێنجوێن ڕایگەیاند: «تیمەکانی پاککردنەوەی ڕێگاوبان لە کاتژمێر ٩:٠٠ی بەیانییەوە لەوێن و بەردەوام سەرقاڵی خوێڕشتن و ڕاماڵینی بەفرەکەن، بەڵام بەهۆی ئەوەی بەفربارین بەردەوامە و پلەکانی گەرما نزمە، خێرا شەقامەکە دەبێتە شەختە و دەیبەستێت». ناوبراو ئاماژەی بەوەشکرد کە قەرەباڵغییەکی زۆر لەسەر ڕێگاکە دروستبووە، بەڵام «گیانی هاوڵاتیان لە هەموو شتێک گرنگترە» و نایانەوێت سەرکێشی بە ژیانی شۆفێرانەوە بکەن.
سەبارەت بە رێنماییەکان بۆ شۆفێران، بەرپرسانی قەزاکە ڕوونیانکردەوە کە تەنها لە کاتی زۆر پێویستدا ئۆتۆمبێلی دەبڵ ئەکسل و ئەوانەی تایەکانیان بە زنجیر بەستراوە دەتوانن ڕێگاکە بەکاربهێنن، بەڵام بە توندی داوا لە خاوەن ئۆتۆمبێلە بچووکەکان (قەمەرە) دەکەن بەهیچ شێوەیەک ڕوو لەو ڕێگایە نەکەن چونکە توانای بڕینیان نییە.
کەشناسی هەرێم پێشبینی دەکات شەپۆلی بەفربارین لە ناوچە شاخاوییەکان تا درەنگانی ئەمشەو بەردەوام بێت، ئەمەش مەترسی دروستبوونی شەختە زیاتر دەکات.