بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان ڕایگەیاند، لە درەنگانی شەوی شەممەوە کاریگەریی شەپۆلێکی دابارین ڕوو لە ناوچەکە دەکات و لە زۆربەی ناوچەکان باران دەبارێت، هاوکات لە ناوچە شاخاوییەکان و سنوورییەکان پێشبینی بەفر و نمەباران دەکرێت.
بەگوێرەی پێشبینییەکان، ئەمڕۆ شەممە ئاسمان هەوری تەواو دەبێت و لە ناوچەکانی دهۆک و باکووری هەرێم نمەباران دەبێت، بەڵام لە شەودا کاریگەرییەکە فراوانتر دەبێت و دەبێتە بارانی مامناوەند لە سەرتاسەری هەرێم. سەبارەت بە سبەی یەکشەممە، کەشناسی ڕوونی کردووەتەوە: «ئاسمان هەوری باراناوی دەبێت و نمەباران و بارانی مامناوەند دەبارێت، لە دوای نیوەڕۆوە کاریگەرییەکە کەم دەبێتەوە و دەبێتە پچڕپچڕ». شارەزایانی کەشناسی ئاماژە بەوە دەدەن کە ئەمە سەرەتای سێ شەپۆلی بارانبارینە و پێشبینی دەکرێت ڕۆژانی سێشەممە و چوارشەممە بارانی بەخوڕ و هەورەبروسکە ناوچەکە بگرێتەوە.
پلەکانی گەرما و خێرایی با
پێشبینی دەکرێت پلەکانی گەرما کەمێک بەرزببنەوە یان وەک خۆیان بمێننەوە. خێرایی با لە نێوان ١٠ بۆ ٢٠ کیلۆمەتر لە كاتژمێرێكدا دەبێت. بەرزترین پلەکانی گەرمای پێشبینیکراو بۆ سبەی بەم شێوەیەن:
هەولێر: ١٥ پلە
سلێمانی: ١٢ پلە
دهۆک: ١٢ پلە
هەڵەبجە: ١٣ پلە
کەرکووک: ١٥ پلە
حاجی ئۆمەران: ٣ پلە
ڕووداوێکی دەگمەن لە چیای ماکۆک
لەگەڵ بەردەوامیی کاریگەرییەکانی وەرزی زستان، گرووپێکی خۆبەخشی ئۆفڕۆد لە ئیدارەی ڕاپەڕین توانییان ئۆتۆمبێلێک لە لوتکەی چیای ماکۆک لەژێر بەفر دەربهێنن، کە بۆ ماوەی ٤٥ ڕۆژ لەژێر نزیکەی دوو مەتر بەفردا مابووەوە.
خاوەنی ئۆتۆمبێلەکە پاسەوانی تاوەرێکی پەیوەندییەکان بووە لە لوتکەی چیاکە و بەهۆی بەفربارینی زۆرەوە ئۆتۆمبێلەکەی گیری خواردبوو. داستان ئەبوبەکر، ئەندامی گرووپی ئۆفڕۆدی حاجیاوا ڕایگەیاند: «هەشت جار هەوڵمان دا تا توانیمان ئۆتۆمبێلەکە دەربهێنین و ڕادەستی خاوەنەکەی بکەینەوە». ئەم گرووپە خۆبەخشە تەنیا لەمساڵدا نزیکەی ١٥٠ ئۆتۆمبێلیان لەناو بەفر و قوڕدا رزگار کردووە.