بەڕێوەبەرایەتیی کەشناسی و شارەزایانی بواری کەشوهەوا هۆشداری دەدەن لە هاتنی شەپۆلێکی بەهێزی بارانبارین، تەرزە و هەورەبرووسکە کە لە ڕۆژی سێشەممەوە کاریگەرییەکانی توند دەبن.
بەگوێرەی پێشبینییەکان، سبەی دووشەممە بەهۆی کاریگەریی بارستەهەوایەکی گەرم و شێدار، پلەکانی گەرما ٣ بۆ ٤ پلە بەرز دەبنەوە و لە هەندێک ناوچەی دهۆک و سۆران نمەباران دەبێت. بەڵام لە نیوەڕۆی ڕۆژی سێشەممەوە دۆخەکە بە تەواوی دەگۆڕێت؛ بەهۆی نزمەپاڵەپەستۆی دەریای ناوەڕاستەوە شەپۆلێکی بەهێز ناوچەکە دەگرێتەوە و تا بەرەبەیانی چوارشەممە بە چالاکی دەمێنێتەوە.
هۆشداریی لافاو و تەرزە بۆ شۆفێران
هەڤاڵ سدیق گەڵۆزی و ئاراس جەبار، شارەزایانی کەشناسی ڕوونیان کردووەتەوە کە شەپۆلەکە بەسەر دوو ئاستدا دابەش دەبێت:
پلە یەک (زۆر بەهێز): ناوچەکانی ئیدارەی گەرمیان، پارێزگاکانی سلێمانی و هەڵەبجە، ئیدارەی ڕاپەڕین، سۆران و ناوچە شاخاوییەکانی هەولێر و ئامێدی. لەم ناوچانە ئەگەری بارانی بەخوڕ (٥٠ بۆ ٧٠ ملم)، تەرزەبارین و دروستبوونی لافاو لە شوێنە نزمەکاندا هەیە. هۆشداری دراوە بە شۆفێران کە ئاگاداری ئۆتۆمبێلەکانیان بن لە ئەگەری زیانپێگەیشتن بەهۆی تەرزەوە.
پلە دوو (مامناوەند): سەنتەری هەولێر، کەرکووک، دەشتی قەراج و مەخموور. بڕی بارانبارین لەنێوان ١٥ بۆ ٢٥ ملیم دەبێت.
پێشبینی دەکرێت لە چوارشەممەوە لە ناوچە شاخاوییە بەرزەکان (سەرووی ١٢٠٠ مەتر) بەفر ببارێت و پلەکانی گەرما دابەزین بەخۆیانەوە ببینن. هەروەها شەوی پێنجشەممە ئەگەری دروستبوونی تەمومژی چڕ هەیە.
ئاماری بارانبارین و بەفری باکوور
کەشناسیی سلێمانی ڕایگەیاندووە کە کۆی گشتیی بارانبارینی ئەم وەرزە گەیشتووەتە ٥١٩.٣ ملیم. تەنیا لە مانگی کانوونی دووەمدا ١٥٢.١ ملیم باران باریوە، کە ٣٠ ملیم زیاترە لە تێکڕای ساڵانەی مانگەکە.
لە لایەکی دیکەوە، شەپۆلی بەفر و کڕێوە باکووری کوردستانی گرتووەتەوە. بەپێی ئامارەکان، ڕێگەی ٢٧٨ گوند داخراون (١٠٠ لە بەدلیس، ٧٨ لە وان، ٥٩ لە جۆلەمێرگ و ٤١ لە مووش) و تیمەکان سەرقاڵی پاککردنەوەیانن.