دوای ئەوەی بڕیاری دەرکردنی قوتابییەکی کورد لە قوتابخانەیەکی ناحکومیی شاری کەرکووک بەهۆی کێشانی وێنەی ئاڵای کوردستانەوە کاردانەوەی لێکەوتەوە، بەڕێوەبەرایەتیی گشتیی پەروەردەی کەرکووک بڕیارەکەی هەڵوەشاندەوە و قوتابییەکە دەگەڕێتەوە بۆ خوێندن.

وردەکاریی ڕووداوەکە

قوتابی «دیار خەلیل ئیبراهیم»، کە قوتابیی پۆلی نۆی بنەڕەتییە لە قوتابخانەی «ئەجیال نەسری» لە شاری کەرکووک، لە کاتی تاقیکردنەوەی نیوەی ساڵ بۆ وانەی هونەر، وێنەی ئاڵای کوردستانی کێشابوو. بەو هۆیەوە لەلایەن کارگێڕیی قوتابخانەکەوە سزای دەرکردن و بێبەشکردن لە خوێندنی ساڵی (٢٠٢٥-٢٠٢٦)ی بۆ دەرکرابوو. دیار خەلیل لە لێدوانێکدا ڕایگەیاندووە: «دوێنێ تاقیکردنەوەکەم ئەنجامدا و ئەمڕۆ چوومە قوتابخانە بۆ تاقیکردنەوەیەکی دیکە، بەڵام بەڕێوەبەر ڕێگەی نەدا و پێی ڕاگەیاندنم کە دەرکراوم». ئەو قوتابییە جەختی کردەوە کە پەشیمان نییە و شانازی بە ئاڵای کوردستانەوە دەکات.

هەڵوێستی وەزیری پەروەردە

ئالان حەمەسەعید، وەزیری پەروەردەی حکوومەتی هەرێمی کوردستان، دەستبەجێ هاتە سەر هێڵ و ڕایگەیاند: «بە هیچ جۆرێک ئەمە قبووڵ ناکرێت». ناوبراو ئاشکرای کرد کە پەیوەندی بە بەڕێوەبەرایەتیی گشتیی پەروەردەی کەرکووک (سەر بە حکوومەتی فیدراڵ) کردووە و ئەوانیش بەڵێنی چارەسەرکردنیان داوە. وەزیری پەروەردە ئامادەیی خۆیشی دەربڕی کە خەرجیی خوێندنی ئەو قوتابییە لە ئەستۆ بگرێت و دڵنیایی دا کە «ئەو منداڵە بێ خوێندن نامێنێتەوە».

بڕیاری پەروەردەی کەرکووک و لێپرسینەوە

سامان بەرزنجی، جێگری بەڕێوەبەری گشتیی پەروەردەی کەرکووک ڕایگەیاند، دەستبەجێ دوای ئاگاداربوون، دەستوەردانیان کردووە و بڕیاری دەرکردنی قوتابییەکەیان بە هەموو شێوەیەک هەڵوەشاندووەتەوە. ناوبراو جەختی کردەوە کە ئاڵای کوردستان سیمبوڵێکی نەتەوەییە و نابێت کێشانی ببێتە هۆی سزادان.

هاوکات د. ئەحمەد کەرکووکی، ئەندامی ئەنجوومەنی پارێزگای کەرکووک ڕایگەیاند کە بڕیارە سبەینێ پێنجشەممە، ئەو مامۆستا و بەڕێوەبەرەی بڕیارەکەیان دەرکردووە، بانگهێشتی پەروەردە بکرێن و لێپرسینەوەی یاساییان لەگەڵدا بکرێت.