بەرەبەیانی ئەمڕۆ هەینی (٢ی کانوونی دووەمی ٢٠٢٦) لە گەڕەکی «گازینۆ»ی قەزای کەلار، ڕووداوێکی دڵتەزێن بەهۆی لێچوونی غازی زۆپاوە ڕوویدا و بووە هۆی گیانلەدەستدانی هاوڵاتییەک و برینداربوونی یەکێکی دیکە.
ڕەفیق قادر، بەڕێوەبەری نەخۆشخانەی فریاکەوتنی شەهید هەژار لە کەلار بە میدیاکانی ڕاگەیاند، کاتژمێر ٨:٠٠ی بەیانی دوو ئافرەت گەیەندراونەتە نەخۆشخانەکەیان کە خوشکی یەکترن و لەکاتی خەودا غاز لێیداون. ناوبراو وتی: «بەداخەوە یەکێکیان پێش گەیشتنی بە نەخۆشخانە گیانی لەدەستدابوو، ئەوەی دیکەشیان دوای وەرگرتنی چارەسەری سەرەتایی، بەهۆی خراپیی تەندروستییەوە ڕەوانەی نەخۆشخانەکانی سلێمانی کرا».
بەگوێرەی زانیارییە پزیشکی و ئەمنییەکان، ئەو دوو خوشکە لە یەک ماڵدا ژیاون و ڕووداوەکە لەکاتی خەودا بووە. ئەو خوشکەی گیانی لەدەستداوە تەمەنی ٦٠ ساڵە و خوشکەکەی دیکەشیان کە دۆخی تەندروستی ناجێگیرە تەمەنی ٥٥ ساڵە. لێکۆڵینەوەکان دەریانخستووە هۆکارەکە لێچوونی غاز بووە لە زۆپاکەیانەوە کە بووەتە هۆی تەنگەنەفەسی توند و ژەهراویبوون.
ساڵانە لە وەرزی زستاندا، بەهۆی پابەندنەبوون بە ڕێنماییەکانی سەلامەتی و بەکارهێنانی زۆپای غاز و نەوت لەکاتی خەودا، ڕووداوی هاوشێوە لە ناوچە جیاوازەکانی هەرێمی کوردستان تۆمار دەکرێن. لایەنە پەیوەندیدارەکان و بەرگری شارستانی بەردەوام هۆشداری دەدەن کە هاوڵاتیان پێش نوستن دڵنیابنەوە لە کوژاندنەوەی ئامێرەکانی گەرمکردنەوە یان بوونی سیستەمی هەواگۆڕکێی گونجاو.