دوای ئەوەی بەهۆی بەفربارینی زۆرەوە بۆ ماوەی دوو ڕۆژ پەیوەندییان پچڕا و لە ناوچە شاخاوییەکان گیریان خواردبوو، سەرجەم ئەو هاووڵاتی و گەشتیارانەی لە سنووری سیدەکان و دەڤەری برادۆست بێسەروشوێن ببوون، ڕزگار کران.
ڕزگارکردنی ١٩ شوانکارە و کاسبکار
ئیحسان چەلەبی، قایمقامی قەزای سیدەکان ڕایگەیاند، دوای گەیشتنی تیمەکانی ڕزگارکردن دەرکەوت ژمارەی ئەو کەسانەی لە کوێستانی لۆلان گیریان خواردبوو ١٩ کەسن، نەک ٢١ کەس وەک ئەوەی سەرەتا پێشبینی دەکرا. بەگوێرەی زانیارییە نوێیەکان، ئەو گرووپە پێکهاتبوون لە ١١ هاووڵاتیی خەڵکی ڕۆژهەڵاتی کوردستان و ٨ هاووڵاتیی هەرێمی کوردستان بە ناوەکانی (تاجیر قادر، محەمەد عوسمان، مەتین ئەرشەد، ئاراس قادر، نیهاد حەمەئەمین، محەمەد غازی، پوشۆ ئیسماعیل و ئەحمەد قاسم). قایمقامی سیدەکان دڵنیایی دا کە دۆخی تەندروستیی سەرجەمیان باشە و زیاتر لە ٢٨٠ سەر ئاژەڵیشیان لەگەڵدا بووە کە بە سەلامەتی ڕزگار کراون. بە وتەی یەکێک لە ڕزگاربووان، دۆخیان زۆر سەخت بووە و بەهۆی سەرما و کڕێوەوە تەواو هیوابڕاو ببوون پێش ئەوەی تیمەکان بگەنە لایان.
ڕزگارکردنی ٧ گەشتیار
لە ڕووداوێکی جیادا لە هەمان سنوور، بەڕێوەبەرایەتیی بەرگریی شارستانیی سۆران ئاشکرای کرد کە تیمەکانیان توانیویانە ٧ گەشتیار ڕزگار بکەن کە لە کوێستانی کێلەشین گیریان خواردبوو. ئۆپەراسیۆنی ڕزگارکردنی ئەم گەشتیارانە نزیکەی ٨ کاتژمێری خایاندووە و تیمەکان بە پیادە و ئامێری تایبەت توانیویانە بگەنە لایان و بە سەلامەتی بیانہێننە خوارەوە.
دۆزینەوەی ٤ شوانکارە لە پشدەر
هاوکات لە سنووری قەزای پشدەر، چوار شوانکارەی خەڵکی ڕۆژهەڵاتی کوردستان کە بەهۆی کڕێوە و بەفرەوە لە گوندەکانی بناری مەنگوڕایەتی و چیای قەندیل ڕێگەیان لێ ون ببوو، دوای سێ ڕۆژ مانەوە دۆزرانەوە. قایمقامیەتی پشدەر ڕایگەیاند، شوانکارەکان بە ناوەکانی (عەبدوڵا رەمەزانی، عەبدوڵا تەنانی، عەلی راد و فەرهاد راد) لەلایەن خەڵکی ناوچەکەوە دۆزراونەتەوە و دۆخی تەندروستییان جێگیرە.
هۆشداری بەهۆی دۆخی کەشوهەوا
بەهۆی ئەو شەپۆلە بەفر و سەرما سەختەی ڕووی لە ناوچەکە کردووە، لە هەندێک ناوچەی شاخاوی سیدەکان ئاستی بەفر گەیشتووەتە نزیکەی دوو مەتر. لایەنە پەیوەندیدارەکان داوا لە هاووڵاتییان و گەشتیاران دەکەن تا ئاساییبوونەوەی کەشوهەوا، خۆیان لە سەردانکردنی ناوچە شاخاوییە سەختەکان بەدوور بگرن.