بەیانی ئەمڕۆ دووشەممە ٢٩ی کانوونی یەکەمی ٢٠٢٥، بەشدار سامی، شاعیر و نووسەر و فۆتۆگرافەری ناسراوی کورد، لە تەمەنی ٤١ ساڵیدا لە نەخۆشخانەی ژینی تایبەت لە شاری هەولێر کۆچی دوایی کرد.
هۆکاری گیانلەدەستدانەکەی
بە وتەی حەمە مەنتک، نووسەر و هاوڕێی نزیکی ناوبراو، بەشدار سامی ماوەیەکە بەدەست نەخۆشیی شێرپەنجەوە دەیناڵاند و دوای ململانێیەکی سەخت لەگەڵ نەخۆشییەکەی، دواجار گیانی لەدەستدا.
ژیاننامە و بەرهەمەکانی
بەشدار سامی ساڵی ١٩٨٤ لە شارۆچکەی مەخموور لەدایکبووە و دانیشتووی شاری هەولێر بووە. ئەو بە یەکێک لە دەنگە دیار و نوێیەکانی شیعری کوردی دەناسرا و خاوەنی چوار کتێبی شیعری چاپکراو بوو بە ناونیشانەکانی (سبەی ڕۆژێکی دیکەیە، ئێوارە سەرابییەکان، ڕۆیشتن بە ئاراستەی مردووە بەڕێزەکان، لە گوڵ دەترسم). یەکەم بەرهەمی شیعریی بە ناوی “ئێوارە سەرابییەکان” لە ساڵی ٢٠٠٦ چاپ و بڵاوکردووەتەوە.
خەڵات و دەستکەوتەکان
لە ماوەی ژیانی ئەدەبیدا چەندین خەڵاتی بەدەستهێناوە، لەوانە؛ خەڵاتی ڤێستیڤاڵی نەورۆز لە ساڵی ٢٠٠٧، خەڵاتی لاوی ساڵ لە وەزارەتی ڕۆشنبیری لە ساڵی ٢٠١٠، هەروەها لە ساڵانی ٢٠١١ و ٢٠١٤ خەڵاتی یەکەمی ڤێستیڤاڵی گەلاوێژی بۆ شیعر پێ بەخشراوە.
کاری هونەری
جگە لە شیعر، بەشدار سامی دەستێکی باڵای لە هونەری فۆتۆگرافیدا هەبووە و بەشدار بە یەکەم فۆتۆگرافەر دادەنرێت کە لە ساڵی ٢٠١٣ پێشانگایەکی تایبەتی بۆ فۆتۆی ئیرۆتیک کردووەتەوە. هەروەها لە بواری ڕۆژنامەوانیشدا کاری کردووە و لە ساڵی ٢٠٠٧ لە گۆڤاری نووهات وەک فۆتۆگرافەر و ئامادەکاری لاپەڕەی فۆتۆ و توانج کاری کردووە.
پەیامی سەرەخۆشی
لای خۆیەوە مەسرور بارزانی، سەرۆکی حکوومەتی هەرێمی کوردستان، پەیامێکی سەرەخۆشیی بڵاوکردەوە و تێیدا هاوخەمیی خۆی بۆ کۆچی دوایی شاعیر و نووسەر بەشدار سامی دەربڕی و پرسە و سەرەخۆشی ئاراستەی بنەماڵە و کەسوکار و هاوڕێیانی کرد.