سەرەڕای ڕاگەیاندنی درێژکردنەوەی ئاگربەست لە نێوان هێزەکانی سووریای دیموکرات (هەسەدە) و حکومەتی دیمەشق بۆ ماوەی ١٥ ڕۆژ، دۆخی مەیدانی لە ڕۆژئاوای کوردستان هێشتا لەبەردەم مەترسیی تەقینەوەدایە. وەزارەتی بەرگریی سووریا ڕایگەیاندووە کە ئاگربەستەکە لە کاتژمێر ١١:٠٠ی شەوی ڕابردووەوە دەستی پێکردووە و ئامانج لێی پاڵپشتیکردنی ئۆپەراسیۆنێکی هێزەکانی ئەمریکایە بۆ گواستنەوەی دیلەکانی داعش بۆ عێراق. لە بەرامبەردا، ناوەندی ڕاگەیاندنی هەسەدە جەختی کردەوە کە بە نێوەندگیریی نێودەوڵەتی ڕێککەوتنەکە کراوە بە ئامانجی کەمکردنەوەی ئاڵۆزییەکان و پاراستنی خەڵکی مەدەنی.
هەرچەندە ئاگربەست ڕاگەیەندراوە، بەڵام متمانە لە نێوان لایەنەکاندا لە نزمترین ئاستدایە. بەپێی زانیارییە مەیدانییەکان، هێزێکی گەورەی شەڕڤانان لە دەروازەی شاری حەسەکە جێگیر کراون و ئامادەکاری بۆ هەر ئەگەرێکی نەخوازراو دەکەن. هەسەدە لە بەیاننامەیەکدا هۆشداریدا کە حکومەتی دیمەشق «بە شێوەیەکی سیستماتیک بەردەوامە لە ئامادەکارییە سەربازییەکان» و تۆمەتباری کردن بەوەی لە دوو میحوەرەوە لە جزیرە هێرشیان کردووەتە سەر هێزەکانیان، کە ئەمەش بە «پێشێلکارییەکی ئاشکرای ڕێککەوتنی ئاگربەست» وەسف دەکرێت.
هاوکات لەگەڵ ئاڵۆزییە ناوخۆییەکان، ڕەجەب تەیب ئەردۆغان، سەرۆککۆماری تورکیا پەیامێکی نوێی ئاڕاستەی کوردانی سووریا کرد. ئەردۆغان ڕایگەیاند کە بە کۆتاییهاتنی ئەوەی ئەو بە «تیرۆر» ناوی دەبات، مافی کورد لە سووریا دەدرێت و وتی: «کورد جاران لە سووریادا نەبوون، ئێستا مافی بوونیان هەیە و لە ئاستی باڵادا مافەکانیان دەستەبەر دەبێت»، بەڵام مەرجی ئەوەی دانا کە گرووپە چەکدارەکان ناوچەکە جێبهێڵن.
لە لایەکی دیکەوە شاندێکی باڵای پارتی دەم بە سەرۆکایەتیی تولای هاتیمئۆغوڵڵاری و تونجەر باکرهان سەردانی ڕۆژئاوای کوردستانیان کرد. باکرهان هۆشداری دا لەوەی لەو ناوچانەی کورد لێی کشاوەتەوە، «ئاڵای داعش هەڵکراوە» و جەختی کردەوە کە پیلانێک هەیە بۆ سڕینەوەی ناسنامەی کورد. ساڵح موسلیم، ئەندامی ئەنجوومەنی سەرۆکایەتیی پەیەدەش ئاشکرای کرد کە پیلانێکی نێودەوڵەتی لە ئارادایە و بانگەشەی ئەوەی کرد نوێنەری ئەمریکا پێشنیاری کردووە ئەگەر شەڕی حەشدی شەعبی بکەن، هێرشەکان ڕادەگرێت. لە وەڵامی ئەم هەڕەشانەدا، لە شاری دێرک خەڵکی ناوچەکە یەکینەی پاراستنی گەلیان دامەزراندووە و ڕاگەیاندنی دۆخی سەفەربەرییان کردووە.