لەگەڵ زیادبوونی گرژییە زارەکی و مەیدانییەکانی نێوان تاران و واشنتۆن، ناوچەکە لەبەردەم ئەگەری پێشهاتی نەخوازراودایە. بەرپرسانی باڵای ئێران هۆشداری توند دەدەن و لە بەرامبەردا هێزەکانی ئەمریکا لە عێراق و سووریا جموجۆڵەکانیان چڕ کردووەتەوە.
هەڕەشەی شەڕی تەواو و لێدان لە ئیسرائیل
عەلی شەمخانی، ڕاوێژکاری عەلی خامنەئی ڕابەری باڵای کۆماری ئیسلامیی ئێران، بە توندی وەڵامی لێدوانەکانی دۆناڵد ترەمپ و بەرپرسانی ئەمریکای دایەوە. شەمخانی ڕایگەیاند: «هەر چالاکییەکی سەربازی ئەمریکی، لە هەر سەرچاوەیەکەوە و لە هەر ئاستێکدا بێت، بە سەرەتای شەڕێکی تەواو دادەنرێت و ئێمەش کاردانەوەمان دەبێت».
ناوبراو هۆشداریی دا کە وەڵامی تاران تەنها بۆ سەرچاوەی هێرشەکە سنووردار نابێت، بەڵکو «ڕاستەوخۆ دڵی تەلەئەبیب دەکاتە ئامانج» و هەموو لایەنگرانی ئەمریکا دەگرێتەوە. ئەم لێدوانانە دوای ئەوە دێن کە سەرۆکی ئەمریکا ئاماژەی بە بوونی هێزێکی زۆری وڵاتەکەی لە ناوچەکە کردبوو و ئێرانی سەرپشک کردبوو لەنێوان شەڕ یان دانوستان.
جموجۆڵی سەربازیی ئەمریکا بەرەو هەولێر
هاوتەریب لەگەڵ هەڕەشەکان، سەرچاوە ئەمنییەکانی عێراق ئاشکرایان کردووە کە کاروانێکی گەورەی سەربازیی ئەمریکا، کە لە دەیان بارهەڵگر و کەرەستەی سەربازی پێکهاتبوو، لە بنکەی «تەنف»ـی سووریاوە بەرەو عێراق جووڵاون. کاروانەکە بەناو بیابانی نەینەوادا تێپەڕیوە و گەیشتووەتە بنکەی سەربازیی حەریر لە پارێزگای هەولێر. هێزە ئەمنییەکانی عێراق ئاماژەیان بەوە کردووە کە لە ٤٨ کاتژمێری ڕابردوودا چاودێری جموجۆڵی گوماناویی هێزەکانی ئەمریکایان کردووە لەسەر سنوورەکان.
گرووپە چەکدارەکان: ئامادەی شەهیدبوونین
کاردانەوەی گرووپە چەکدارەکانی نزیک لە ئێران لە عێراق توند بووە. ئەبوو حسێن حەمیداوی، ئەمینداری گشتیی کەتائیبی حزبوڵڵای عێراق ڕایگەیاند: «ئەگەر ئەمریکا هێرش بکات، لە پشتی ئێران دەبین». ناوبراو هۆشداری دا کە شەڕ دژی ئێران ئاسان نابێت و «ئاگرێک دەبێت کە هەموو بەرژەوەندییەکانی ئەمریکا دەسووتێنێت».
لەلایەکی دیکەوە، فەرماندەیەکی دیکەی هەمان گرووپ ئامادەیی خۆی بۆ ئەنجامدانی «ئۆپەراسیۆنی ئیستشهادی» لە پێناو ئێران دەربڕی. هاوکات لە شارەکانی بەغدا و مووسڵ، خۆپیشاندان بۆ پشتیوانی لە ئێران و ئیدانەکردنی سیاسەتەکانی ئەمریکا بەڕێوەچوو، کە تێیدا ئاڵای ئێران و وێنەی قاسم سلێمانی بەرزکرانەوە.
دیپلۆماسی و پاراستنی سنوورەکان
لە ڕووی دیپلۆماسییەوە، فوئاد حسێن، وەزیری دەرەوەی عێراق گەیشتە تاران و لەگەڵ عەباس عێراقچی، هاوتا ئێرانییەکەی کۆبووەوە. لە کۆبوونەوەکەدا جەخت لەسەر سەقامگیریی عێراق و کشانەوەی هێزەکانی ئەمریکا کرایەوە. عەلی ئەکبەر ویلایەتیش لە پەیوەندییەکی تەلەفۆنیدا لەگەڵ نووری مالیکی، جەختی کردەوە کە بەرەی مقاوەمە (ئێران، عێراق، لوبنان، یەمەن) پێکەوە ڕووبەڕووی ئیسرائیل و ئەمریکا دەبنەوە.
سەبارەت بە دۆخی ئەمنی ناوخۆی عێراق، فالح فەیاز، سەرۆکی دەستەی حەشدی شەعبی ڕایگەیاند کە هیچ هەڕەشەیەک لەسەر عێراق نییە و هێزەکانیان لە سنوورەکان لە ئامادەباشیدان. عەبدولئەمیر شمری، وەزیری ناوخۆی عێراقیش ڕایگەیاند کە سنوورەکان بە خەندەق و کامێرای گەرمایی کۆنتڕۆڵ کراون و فەرمانی تەقەکردن لە هەر کەسێک دراوە کە لە سنوورەکان نزیک ببێتەوە، ئەمەش وەک وەڵامێک بۆ مەترسیی دزەکردنی تیرۆریستانی داعش و گرووپەکانی سەر بە جۆلانی لە سووریاوە.
جووڵەی سیاسیی کورد
لەم دۆخە ئاڵۆزەدا، شاندێکی باڵای پارتی دیموکراتی کوردستان بە سەرۆکایەتی دکتۆر فوئاد حسێن لە بەغدا سەردانی لایەنە شیعەکانی (دەوڵەتی یاسا، بەدر و نەسڕ)ی کردووە بۆ گفتوگۆکردن لەسەر سەقامگیریی سیاسی و پاراستنی مافە دەستوورییەکان.