بەڕێوەبەرایەتیی پاسپۆرتی پارێزگای سلێمانی لە بڕیارێکی نوێدا مژدەیەکی دڵخۆشکەری دایە هاووڵاتییان و ڕایگەیاند، لەپێناو پێشکەشکردنی خزمەتگوزاریی زیاتر و کارئاسانی بۆ ئەو کەسانەی دەیانەوێت پاسپۆرتەکانیان نوێ بکەنەوە، گۆڕانکاریی لە ڕسووماتەکاندا کردووە.

وردەکاریی بڕیارەکە

بەپێی ڕاگەیەندراوێکی بەڕێوەبەرایەتییەکە کە ئەمڕۆ یەکشەممە ٢٥ی کانوونی دووەم بڵاوکراوەتەوە، بڕیارەکە تایبەتە بەو پاسپۆرتانەی کە هێشتا ساڵێک زیاتریان ماوە بۆ بەسەرچوون (Expire) و خاوەنەکەی لەسەر خواستی خۆی (حسب رغبة) داوای نوێکردنەوەی دەکات. لەمەودوا تێچووی ئەم مامەڵەیە لە ٢٠٠ هەزار دینارەوە دەکرێتە ٥٠ هەزار دینار.

کەمکردنەوەی ١٥٠ هەزار دینار

پێشتر هاووڵاتییان بۆ نوێکردنەوەی پاسپۆرتێک کە وادەکەی بەسەر نەچووبێت (زیاتر لە ساڵێکی مابێت)، دەبوایە بڕی ٢٠٠ هەزار دینار بدەن، بەڵام بەم بڕیارە نوێیە ١٥٠ هەزار دینار لە تێچووەکە دەگەڕێتەوە بۆ گیرفانی هاووڵاتییان. ئەم هەنگاوەش وەک بەشێک لە پلانی ساڵی نوێ بۆ باشترکردنی خزمەتگوزارییەکان و کەمکردنەوەی بارگرانیی دارایی لەسەر شانى هاووڵاتییان وەسف کراوە.

بەڕێوەبەرایەتیی پاسپۆرتی سلێمانی ئاماژەی بەوەش کردووە، ئەم ئاسانکارییە بۆ ئەوەیە هاووڵاتییان بتوانن بەبێ خەرجییەکی زۆر، پاسپۆرتەکانیان نوێ بکەنەوە، بەتایبەت ئەوانەی بۆ مەبەستی گەشتکردن پێویستیان بەوەیە ماوەی پاسپۆرتەکانیان درێژ بێت.