فەرمانگەی کارەبای مەخموور لە ئاگادارییەکدا بۆ دانیشتووانی قەزاکە ڕایگەیاند، ئەمڕۆ یەکشەممە 25ی کانوونی دووەمی 2026، بەهۆی کارکردنی تیمەکانی «پڕۆژەی ڕووناکی» لەسەر دوو فیدەری سەنتەری قەزاکە، دەستکاری تۆڕەکانی کارەبا دەکرێت.

بەگوێرەی ئاگادارییەکە، لە کاتژمێر 8:30ی بەیانییەوە تاوەکو کاتژمێر 5:00ی ئێوارە، کارەبای نیشتمانی لە چەند ناوچەیەکی سەنتەری مەخموور دەبڕدرێت. ئەو گەڕەکانەی کە دەکەونە بەر ئەم پچڕانە و بۆ ماوەی هەشت کاتژمێر و نیو بێ کارەبا دەبن، بریتین لە:

• بەشێک لە گەڕەکی بندیان

• بەشێک لە گەڕەکی شەهیدان

• گەڕەکی شێروان

• بەشێک لە گەڕەکی سەرای

• گەڕەکی زانایان

• ناو بازاڕ

  کارکردنی تیمەکان لە چوارچێوەی هەوڵەکانە بۆ گەیاندنی کارەبای 24 کاتژمێری بە ناوچە جیاجیاکانی کوردستان. بەپێی داتاکانی وەزارەتی کارەبا، لە ئێستادا ڕێژەی 70%ی هاووڵاتییانی هەرێمی کوردستان، کە دەکاتە نزیکەی چوار ملیۆن و 500 هەزار کەس، لە «پڕۆژەی ڕووناکی» سوودمەند بوون.

  ئەم پڕۆژەیە کە وەک یەکێک لە هەنگاوە ستراتیژییەکانی کابینەی نۆیەم بۆ چارەسەرکردنی بنەڕەتی کێشەی کارەبا ئەژمار دەکرێت، ئامانجی ئەوەیە کۆتایی بە دەنگی مۆلیدە و پیسبوونی ژینگە بهێنێت و کارەبای بەردەوام بۆ سەرجەم هاوبەشان دابین بکات.