شەوی ڕابردوو لە سنووری پارێزگای کەرکووک، تەرمی کەسێک لە نزیک بەنداوی خاسە دۆزرایەوە کە بەهۆی مانەوەی زۆرەوە جەستەی شێواوە، ئەمەش لە کاتێکدایە لە دوو ڕووداوی جیادا لە سلێمانی و مێردین سێ هاووڵاتی کوژران.
دۆزینەوەی تەرمێک لە کەرکووک
سەرچاوەیەک لە پۆلیسی کەرکووک ڕایگەیاند، درەنگانی شەوی ڕابردوو لەلایەن چەند ماسیگرێکەوە ئاگادار کراونەتەوە لە بوونی تەرمێک لە لێواری بەنداوی خاسە لە نزیک گوندی «کۆچەک». دەستبەجێ مەفرەزەکانی بنکەی پۆلیسی قەرەهەنجیر گەیشتوونەتە شوێنی ڕووداوەکە.
بەپێی زانیارییە سەرەتاییەکان، تەرمەکە ماوەیەکی زۆرە لەو شوێنەدا ماوەتەوە، بەو هۆیەوە جەستەی شێواوە و بۆنی کردووە، تا ئێستاش نەزانراوە ڕەگەزی نێرە یان مێ. تەرمەکە هەڵگیراوەتەوە و ڕەوانەی پزیشکی دادی کەرکووک کراوە بۆ ئەنجامدانی توێکاری و ئاشکراکردنی ناسنامەکەی.
کوژرانی هاووڵاتییەک لە سلێمانی
لەلایەکی دیکەوە، بەیانیی ئەمڕۆ لە نزیک شاری سلێمانی و لە ناوچەی «کۆڵەبی»، دەستڕێژی گولـلە لە هاووڵاتییەک کرا کە لەناو ئۆتۆمبێلەکەی خۆیدا بووە. بەگوێرەی زانیارییەکان، قوربانییەکە تەمەنی لە دەوروبەری ٥٠ ساڵدایە و بەهۆی سەختی برینەکەیەوە گیانی لەدەستداوە. تەرمەکەی ڕەوانەی نەخۆشخانەی شۆڕش کراوە و کەسوکارەکەی ڕایانگەیاندووە کە «کێشەیان لەگەڵ هیچ کەسێکدا نییە».
تاوانێک لە مێردین
لە ڕووداوێکی دیکەدا لە شارۆچکەی نسێبینی سەر بە پارێزگای مێردین لە باکووری کوردستان، دوو خوشک بە ناوەکانی (سوهەیلا - ٤٤ ساڵ) و (سومەیە - ٤١ ساڵ) لەناو ماڵەکەی خۆیاندا لە گەڕەکی ٨ی ئادار بە کوژراوی دۆزرانەوە. پۆلیسی ناوچەکە ڕایگەیاندووە کە هەردووکیان بە فیشەکی دەمانچە کوژراون و لە ڕێگەی کامێرای چاودێرییەوە گومانلێکراوێک دەستنیشان کراوە.