پەیامی پیرۆزبایی سەرۆکایەتییەکانی هەرێم بۆ دەستەی نوێی پەرلەمان

ئەمڕۆ سێشەممە ٣٠ی کانوونی یەکەمی ٢٠٢٥، دوای هەڵبژاردنی دەستەی سەرۆکایەتی خولی شەشەمی ئەنجوومەنی نوێنەرانی عێراق، هەریەکە لە نێچیرڤان بارزانی، سەرۆکی هەرێمی کوردستان و مەسرور بارزانی، سەرۆکی حکوومەتی هەرێمی کوردستان، لە پەیامی جیاوازدا پیرۆزباییان لە سەرۆک و هەردوو جێگرەکەی کرد.

دەستەی سەرۆکایەتی نوێی پەرلەمان کە لەمڕۆدا تەواو بوو، پێکهاتووە لە:

پەیامی مەسرور بارزانی: جەختکردنەوە لە مافە دەستوورییەکانی کوردستان

مەسرور بارزانی، سەرۆکی حکوومەتی هەرێمی کوردستان سێ پەیامی پیرۆزبایی ئاراستەی هەر یەک لە ئەندامانی دەستەی سەرۆکایەتی کرد. لە پەیامەکانیدا جەختێکی تایبەتی لەسەر چارەسەرکردنی کێشەکانی نێوان هەولێر و بەغدا کردەوە.

داواکاری تایبەت لە فەرهاد ئەترووشی

لە پەیامەکەیدا بۆ فەرهاد ئەترووشی، جێگری دووەمی سەرۆکی پەرلەمان، مەسرور بارزانی ئەرکێکی تایبەتی خستە ئەستۆی ناوبراو کە بریتییە لە پاراستنی هاوسەنگی لە نێوان بەرژەوەندی گشتی عێراق و مافەکانی کوردستان. سەرۆکی حکوومەت ڕایگەیاند:

“هیوادارم بەڕێزتان بە هاوکاری و هاوئاهەنگی لەگەڵ دەستەی سەرۆکایەتی و ئەندامانی ئەنجوومەنی نوێنەران، بتوانن خزمەتی بەرژەوەندییەکانی گشت هاووڵاتی و پێکهاتەکانی عێراق بکەن و لە هەمانکاتدا، داکۆکی لە مافە دەستوورییەکانی خەڵکی کوردستانیش بکەن.”

پەیام بۆ سەرۆکی پەرلەمان

سەبارەت بە هەیبەت حەلبووسی، سەرۆکی نوێی پەرلەمان، مەسرور بارزانی هیوای خواست پەرلەمان ڕۆڵی کارا لە چارەسەرکردنی کێشە هەڵپەسێردراوەکان بگێڕێت:

“ئومێدەوارین ئەنجوومەنی نوێنەران وەک دەزگایەکی گرنگیی یاسادانان، ڕۆڵی کارای خۆی لە چارەسەرکردنی کێشە هەڵپەسێردراوەکانی نێوان هەرێمی کوردستان و حکوومەتی فیدراڵدا بگێڕێت و پڕۆژە یاسای پێویست و گرنگ لە بەرژەوەندی گشت پێکهاتەکان پەسەند بکەن.”

پەیامی نێچیرڤان بارزانی: بەرپرسیارێتی نیشتمانی لە قۆناغێکی هەستیاردا

نێچیرڤان بارزانی، سەرۆکی هەرێمی کوردستان لە پەیامەکانیدا جەختی لەسەر “گیانی پێکەوەیی”، “پاراستنی دەستوور” و “سەقامگیری” کردەوە.

سەرۆکی هەرێم بۆ هەیبەت حەلبووسی نووسیویەتی:

“هەڵبژاردنی بەڕێزیان بۆ ئەم پۆستە باڵایە و متمانەی ئەندامانی ئەنجوومەنی نوێنەران، بەرپرسیاریێتییەکی نیشتمانیی گەورە دەخاتە ئەستۆیان لە قۆناخێکی هەستیاری مێژووی وڵاتدا. ئومێدەوارین ببێتە مایەی پتەوکردنی کاری پەرلەمانیی بنیاتنەر و پاراستنی دەستوور.”

سەبارەت بە فەرهاد ئەترووشی، نێچیرڤان بارزانی داوای کرد ناوبراو ببێتە هاندەرێک بۆ پتەوکردنی گیانی هاوکاری:

“چاوەڕوانین بوونی بەڕێزیان لەو پێگەیەدا، هاندەرێک بێت بۆ پتەوکردنی گیانی هاوکاری و پێکەوەکارکردن لەنێوان فراکسیۆنە جیاوازەکاندا و سەرخستنی کاری پەرلەمانی بە شێوەیەک کە لە خزمەتی هەموو پێکهاتەکانی عێراقدا بێت.”

هەروەها لە پەیامێکدا بۆ عەدنان فەیحان، جێگری یەکەم، هیوای خواست ڕۆڵێکی کاریگەر لە دروستکردنی هەماهەنگی و لێکگەیشتنی زیاتر لەنێوان فراکسیۆن و هێزە سیاسییەکاندا بگێڕێت.

هەڵوێستی مەکتەبی سیاسی یەکێتی

هاوتەریب لەگەڵ سەرۆکایەتییەکانی هەرێم، مەکتەبی سیاسیی یەکێتیی نیشتمانیی کوردستان پەیامێکی پیرۆزبایی ئاراستەی فەرهاد ئەترووشی کرد بەبۆنەی هەڵبژاردنی بە جێگری دووەمی سەرۆکی پەرلەمان.

لە پەیامەکەی مەکتەبی سیاسی یەکێتیدا هاتووە:

“بەڕێز فەرهاد ئەترووشی، بەبۆنەی هەڵبژاردنتان و بەدەستهێنانی متمانەی پەرلەمانتاران، پیرۆزبایتان لێدەکەین و هیوادارین لەم ئەرک و لێپرسراوێتییەدا سەرکەوتووبن.”

ئەم پەیامانە دوای ئەوە دێن کە پڕۆسەی هەڵبژاردنی دەستەی سەرۆکایەتی پەرلەمان دوای مشتومڕێکی زۆر و چەندین گەڕی دەنگدان، دواجار ئەمڕۆ سێشەممە بە هەڵبژاردنی جێگری دووەم کۆتایی هات.