هەڵبژاردنی جێگری دووەم لە گەڕی سێیەمدا

ئێوارەی ئەمڕۆ سێشەممە ٣٠ی کانوونی یەکەمی ٢٠٢٥، لە دانیشتنی ئەنجوومەنی نوێنەرانی عێراقدا و لە گەڕی سێیەمی دەنگداندا، فەرهاد ئەترووشی کاندیدی پارتی دیموکراتی کوردستان توانی متمانەی زۆرینەی پەرلەمانتاران بەدەستبهێنێت و وەک جێگری دووەمی سەرۆکی پەرلەمان هەڵبژێردرێت.

پرۆسەی هەڵبژاردنەکە دوای ئەوە هات کە لە دوو گەڕی ڕابردوودا، هیچ یەکێک لە کاندیدەکان (شاخەوان عەبدوڵڵا و د. ڕێبوار کەریم) نەیانتوانیبوو دەنگی پێویست (١٦٦ دەنگ) بەدەستبهێنن. بەو هۆیەوە پارتی دیموکراتی کوردستان دوای هەموارکردنی ماددەی ٧ی پەیڕەوی ناوخۆ، بڕیاریدا کاندیدەکەی خۆی بگۆڕێت و لە بری شاخەوان عەبدوڵڵا، فەرهاد ئەترووشی کاندید کرد.

وردەکاری ئەنجامی دەنگدانەکە

بەگوێرەی زانیارییەکان، ٣٠٠ پەرلەمانتار ئامادەی دانیشتنەکە بوون و لە پرۆسەی دەنگدانەکەدا ٢٩٤ پەرلەمانتار بەشدارییان کرد. ئەنجامەکان بەم شێوەیە یەکلایی بوونەوە:

دوای ڕاگەیاندنی ئەنجامەکان، دەستەی سەرۆکایەتی پەرلەمانی عێراق بۆ خولی شەشەم بەم شێوەیە تەواو بوو:

• هەیبەت حەلبووسی - سەرۆکی پەرلەمان

• عەدنان فەیحان - جێگری یەکەم

• فەرهاد ئەترووشی - جێگری دووەم

هەڵوێستی یەکێتی و پەیامی پیرۆزبایی بافڵ تاڵەبانی

یەکێک لە وەرچەرخانە سەرەکییەکانی گەڕی سێیەم، گۆڕینی هەڵوێستی فراکسیۆنی یەکێتیی نیشتمانیی کوردستان بوو. د. بڕیار ڕەشید و هەرێم کەمال ئاغا لە فراکسیۆنی یەکێتی ڕایانگەیاند کە بڕیاریانداوە دەنگ بە کاندیدەکەی پارتی بدەن.

دەستبەجێ دوای هەڵبژاردنی، بافڵ جەلال تاڵەبانی، سەرۆکی یەکێتیی نیشتمانیی کوردستان وەک یەکەم سەرکردەی سیاسی پەیامێکی پیرۆزبایی ئاراستەی فەرهاد ئەترووشی کرد. لە پەیامەکەیدا هاتووە:

“بەڕێز فەرهاد ئەترووشی، جێگری دووەمی سەرۆکی ئەنجوومەنی نوێنەرانی عیراق، بەبۆنەی هەڵبژاردنتان و بەدەستهێنانی متمانەی زۆرینەی پەرلەمانتاران، پیرۆزبایتان لێدەکەم و هیوادارم لەم ئەرکە گرنگەتاندا سەرکەوتووبن.”

هەروەها نێچیرڤان بارزانی، سەرۆکی هەرێمی کوردستان پیرۆزبایی لە هەریەک لە عەدنان فەیحان (جێگری یەکەم) و فەرهاد ئەترووشی (جێگری دووەم) کرد و هیوای خواست ڕۆڵێکی کاریگەر لە پتەوکردنی گیانی هاوکاری نێوان فراکسیۆنەکان بگێڕن.

یەکەم لێدوانی فەرهاد ئەترووشی

فەرهاد ئەترووشی لە یەکەم کۆنگرەی ڕۆژنامەوانیدا دوای هەڵبژاردنی، سوپاسی سەرۆک بارزانی کرد و ڕایگەیاند:

“لەگەڵ هەموو لایەنەکان بە بەردەوامیی دانوستاندنمان هەبوو، بەڵام جەنابی سەرۆک (بارزانی) ڕۆڵی یەکلاییکەرەوەی لەم بابەتەدا هەبوو.”

سەبارەت بە کارنامەی داهاتووی، ئەترووشی ئاماژەی بەوە کرد کە قۆناغی داهاتوو هەڵبژاردنی سەرۆک کۆمارە و دەبێت ئەویش فراکسیۆنی گەورە ڕابسپێرێت بۆ دیاریکردنی سەرۆک وەزیران. هەروەها جەختی کردەوە:

“عێراق وڵاتێکی فیدراڵییە و دەستوور گرێبەستێکە لەنێوانمان. زۆر بڕگەی دەستوور هەن کە جێبەجێ نەکراون و دەبێت لەم چوار ساڵەدا ئەو بڕگانە جێبەجێ بکرێن.”

کاردانەوەی توندی ڕەوتی هەڵوێست

د. ڕێبوار کەریم، کاندیدی ڕەوتی هەڵوێست کە لە گەڕەکانی پێشوودا زۆرینەی دەنگەکانی بەدەستهێنابوو، ڕایگەیاند کە فشاری زۆری لێکراوە بۆ ئەوەی بکشێتەوە، بەڵام قبووڵی نەکردووە. لە کۆنگرەیەکی ڕۆژنامەوانیدا وتی:

“زۆریان داوا لێکردم بکشێمەوە و هەوڵدرا بێزارم بکەن، بەڵام نەکشامەوە. ئەوەی پارتی بەرامبەر من کردی زۆر ناشرین بوو و سەلماندی هەرگیز ناگۆڕێت. ئەنجامەکە هەرچییەک بێت قبووڵمە چونکە پڕۆسەی دیموکراسییە.”

هاوکات غالب محەمەد، پەرلەمانتاری ڕەوتی هەڵوێست وردەکاری زیاتری لەسەر فشارەکان ئاشکرا کرد و لە پەیامێکدا نووسیویەتی:

“پێیان وتین چیتان دەوێت بۆتان دەکەین (پۆست، سەفقە، دەسەڵات) بەس کاندیدەکەتان بکشێننەوە. بەڵام ئێمە یەک دەنگی دەنگدەرانمان بە هەموو سامانی دنیا نەگۆڕییەوە. بە ٥ کورسییەوە مەعنەوییەن لە هێزێکمان بردەوە کە ٧٠ ساڵە هەیە و بانگەشەی ملیۆنێک دەنگ دەکات.”

شیکاری: دوورخستنەوەی شاخەوان عەبدوڵڵا و پەیامی بەغدا

چاودێران گۆڕینی کاندیدی پارتی لە شاخەوان عەبدوڵڵاوە بۆ فەرهاد ئەترووشی بە زیاتر لە تەنها تاکتیکێکی حزبی دەبینن. عادل باخەوان، بەڕێوەبەری ناوەندی فەرەنسی بۆ توێژینەوە دەربارەی عێراق، هۆشداری دەدات لەوەی ڕووداوەکە گوزارشتە لە “شکستێکی بونیەوی”:

“بەپێی ئەزموونم لەگەڵ ناوەندەکانی بڕیار لە بەغدا، هەر نوێنەرێکی کورد (پارتی، یەکێتی یان هەر لایەنێک) ئەگەر بە ڕاشکاوی بەرگری لە مافەکانی گەلی کوردستان و کەرکووک بکات، بەر نەفرەت دەکەوێت. لە بەغدا تەنیا ئەو کوردانە قبووڵکراون کە باس لە کوردبوون ناکەن و وەک عێراقییەکی بێدەنگ ڕەفتار دەکەن. دوورخستنەوەی شاخەوان عەبدوڵڵا سەرکەوتنی ئەو گوتارەیە.”

بایۆگرافیای فەرهاد ئەترووشی

جێگری نوێی سەرۆکی پەرلەمان خاوەنی ئەزموونێکی کارگێڕی و یاساییە:

• ناوی تەواو: فەرهاد ئەمین سەلیم (فەرهاد ئەترووشی)

• لەدایکبوون: ١٩٧٦ - دهۆک

• بڕوانامە: دکتۆرا لە یاسای نێودەوڵەتی / ماستەر و دەرچووی زانکۆی ئیسلامی نێودەوڵەتی مالیزیا.

• پێشینەی کار:

  • ٢٠١٤ - ٢٠٢٠: پارێزگاری دهۆک.

  • ٢٠١٠ - ٢٠١٤: ئەندامی پەرلەمانی عێراق (لیژنەی نەوت و وزە).

  • ٢٠٠٦ - ٢٠١٠: مامۆستای زانکۆ لە کۆلێژی یاسا و ڕامیاری زانکۆی دهۆک.