دوای هەڵبژاردنی دەستەی سەرۆکایەتیی پەرلەمانی عێراق، گەڕێکی نوێ و توندی ململانێی سیاسی لەنێوان لایەنە کوردییەکان لەسەر پۆستی سەرۆک کۆمار دەستیپێکرد. هەیبەت حەلبووسى، سەرۆکى نوێى ئەنجوومەنى نوێنەران بە فەرمی دەرگاى خۆبەربژێرکردنى بۆ پۆستەکە کردەوە. پرۆسەی تۆمارکردن لە ڕۆژی 31ی کانوونی یەکەم تاوەکو 4 یان 5ی کانوونی دووەمی 2026 لە کاتژمێر 9:00ی بەیانی بۆ 3:00ی پاشنیوەڕۆ لە بینای پەرلەمان بەڕێوەدەچێت. بەپێی ماددەی 70ی دەستوور، سەرۆک کۆمار دەبێت بە دەنگی دوو لەسەر سێی پەرلەمانتاران (نزیکەی 220 دەنگ) هەڵبژێردرێت، ئەمەش وادەکات هیچ لایەنێک بەبێ ڕێککەوتن نەتوانێت کاندیدەکەی تێبپەڕێنێت.

هەڵوێست و سێ بژاردەکەی پارتی

پارتی دیموکراتی کوردستان جەخت دەکاتەوە کە پۆستی سەرۆک کۆمار پشکی نەتەوەی کوردە نەک لایەنێکی دیاریکراو. ئامینە زکری، ئەندامی مەکتەبی سیاسی پارتی ڕایگەیاند، مەسعود بارزانی سێ بژاردەی بۆ یەکلاییکردنەوەی ئەو پرسە خستووەتەڕوو:

1. گەیشتن بە ڕێککەوتنی سیاسی نێوان لایەنەکان (سازان).

2. یەکلاییکردنەوەی لەنێو فراکسیۆنە کوردستانییەکانی بەغدا.

3. گەڕانەوە بۆ پەرلەمانی کوردستان بۆ دیاریکردنی بەربژێرێک وەک نوێنەری هەرێم.

   بەگوێرەی زانیارییەکان، پارتی مەرجی ئەوەیە کاندیدەکە بێلایەن بێت یان بە ڕەزامەندی ئەوان بێت. سەرچاوەیەک لەو حزبە هۆشداری داوە: “ئەگەر یەکێتی پێشنیاری ناوێکی بێلایەن پەسەند نەکات، پارتی کاندیدی خۆی دەبێت.”

یەکێتی و یەکلاییکردنەوەی نزار ئامێدی

لە بەرامبەردا، یەکێتیی نیشتمانیی کوردستان ئەو پۆستە بە ئیستحقاقی خۆی دەزانێت و سازشی لەسەر ناکات. بەگوێرەی زانیارییە میدیاییەکان، یەکێتی دواجار بڕیاریداوە نزار ئامێدی، ئەندامی مەکتەبی سیاسی و ڕاوێژکاری پێشووی مام جەلال، وەک کاندیدی فەرمی خۆی دیاری بکات. بڕیارە مەکتەبی سیاسیی یەکێتی پێش کۆتاییهاتنی وادەی یاسایی کۆببێتەوە بۆ پەسەندکردنی کۆتایی و تۆمارکردنی ناوی ناوبراو.

جووڵەی چوارچێوەی هەماهەنگی و ئۆپۆزسیۆن

لەلایەکی دیکەوە، فراکسیۆنی چوارچێوەی هەماهەنگی (شیعەکان) یاداشتی خۆی وەک “گەورەترین فراکسیۆن” پێشکەش کردووە، کە دوای هەڵبژاردنی سەرۆک کۆمار، کاندیدی سەرۆک وەزیران دیاری دەکەن.

هاوکات، عەلی حەمەساڵح، بڕیاردەری ڕەوتی هەڵوێست ئاشکرای کرد کە لەگەڵ یەکگرتوو، کۆمەڵ و نەوەی نوێ تاوتوێی دیاریکردنی بەربژێرێکی هاوبەش دەکەن. ناوبراو ئاماژەی بەوەشکرد کە “یەکەمجارە هێزێکی ئۆپۆزسیۆن بچێتە کێبڕکێیەکی جیدییەوە بۆ پۆستە سیادییەکان”.

مەرجە یاساییەکانی خۆپاڵاوتن

بەپێی ڕاگەیەندراوی پەرلەمانی عێراق و یاسای ژمارە 8ی ساڵی 2012، شەش مەرج بۆ کاندیدی سەرۆک کۆمار دیاریکراون:

1. ڕەگەزنامە: لە دایک و باوکێکی عێراقی لەدایکبووبێت.

2. تەمەن و ئەهلییەت: تەمەنی لە 40 ساڵ کەمتر نەبێت و خاوەن ئەهلییەتی تەواو بێت.

3. بڕوانامە: بڕوانامەی زانکۆ (بەکالۆریۆس)ی هەبێت و لەلایەن وەزارەتی خوێندنی باڵاوە دانپێدانراو بێت.

4. ناوبانگ: خاوەن ناوبانگێکی باش، دەستپاک، دادپەروەر و دڵسۆز بێت بۆ نیشتمان.

5. پێشینە: بە تاوانی ئابڕووبەرانە حوکم نەدرابێت.

6. لێپرسینەوە: ڕێکارەکانی یاسای لێپرسینەوە و دادپەروەری (بعس) نەیگرێتەوە.