دۆناڵد ترەمپ، سەرۆکی ویلایەتە یەکگرتووەکانی ئەمەریکا، لە هەواڵێکی بەپەلەدا ڕایگەیاند کە هێزەکانی وڵاتەکەی لە ئۆپەراسیۆنێکی «بەرفراوان و سەرکەوتوودا» نیکۆلاس مادورۆ، سەرۆکی ڤەنزوێلا و هاوسەرەکەیان دەستگیرکردووە و لە وڵاتەکە بردوویاننەتە دەرەوە.

ترەمپ لە ڕێگەی تۆڕی کۆمەڵایەتیی «تروس سۆشیاڵ»ـەوە بڵاویکردەوە، ئۆپەراسیۆنەکە بە هەماهەنگی دەزگا ئەمنییەکان و بەپێی یاسا ئەنجام دراوە. بڕیارە کاتژمێر ١١:٠٠ـی پێشنیوەڕۆ بە کاتی ئەمەریکا، لە کۆنفرانسێکی ڕۆژنامەوانیدا لە مارالاگۆ وردەکاریی زیاتر لەبارەی ئەم ڕووداوە مێژووییەوە ئاشکرا بکات.

شەوی ئاگرین لە کاراکاس

بەرەبەیانی ئەمڕۆ شەممە ٣ی کانوونی دووەمی ٢٠٢٦، زنجیرەیەک تەقینەوەی بەهێز شاری کاراکاسی پایتەختی ڤەنزوێلای هەژاند. سەرچاوەکان ئاماژەیان بەوە کردووە کە دەنگی فڕۆکە و هەلیکۆپتەری جەنگی لە ئاسمانی شارەکە بیستراوە و بەهۆی بۆردومانەکانەوە لە بەشی باشووری شارەکە، کە بنکەیەکی سەربازیی لێیە، کارەبا بڕاوە. بەهۆی توندیی دۆخەکەوە، حکومەتی ڤەنزوێلا باری نائاسایی ڕاگەیاند.

مادورۆ: بە مووشەک لێمان دەدرێت

پێش بڵاوبوونەوەی هەواڵی دەستگیرکردنەکەی، نیکۆلاس مادورۆ لە دواین لێدوانیدا ڕایگەیاندبوو کە «بە مووشەک هێرش دەکرێتە سەر کاراکاسی پایتەخت» و ڕاستەوخۆ پەنجەی تۆمەتی بۆ ویلایەتە یەکگرتووەکانی ئەمەریکا ڕاکێشا. ئەم پێشهاتانە هاوکاتن لەگەڵ بوونی هێزێکی دەریایی گەورەی ئەمەریکا لە دەریای کاریبی، کە پێشتر وەک بەشێک لە ئۆپەراسیۆنی دژە ماددە هۆشبەرەکان ناسێندرابوو.