جوڵەی بازاڕەکانی جیهان و هەرێمی کوردستان ئەمڕۆ سێشەممە ٦ی کانوونی دووەمی ٢٠٢٦، دۆخێکی تێکەڵاو بەخۆیەوە دەبینێت. لەکاتێکدا زێڕ بەرزبوونەوەی پێوانەیی تۆمار دەکات، نرخی نەوت ڕووی لە دابەزین کردووە و بەهای دیناری عێراقیش بەرامبەر دۆلار بەهۆی فشارە ناوخۆیی و دەرەکییەکانەوە ناجێگیرە.
دۆلار و نیگەرانییە ئابوورییەکان
لە بازاڕەکانی دراوی هەرێمی کوردستان، بەهای ١٠٠ دۆلاری ئەمریکی لە دەوروبەری ١٤٧ هەزار و ٥٠٠ دینار جێگیر بووە، ئەگەرچی لە هەندێک کات و شوێندا نرخەکە گەیشتووەتە ئاستی بەرزتر. شارەزایانی ئابووری هۆکاری ئەم ناجێگیرییە بۆ پشووەکانی سەری ساڵ و ڕێکارە نوێیەکانی بانکی ناوەندی دەگەڕێننەوە، بەتایبەت وەرگرتنی گومرگی پێشوەختە.
جەبار گۆران، وتەبێژی بازاڕی دۆلارەکەی سلێمانی هۆشداری دەدات و دەڵێت: «مەترسی و نیگەرانی ئەوەیە کە ڕەنگە نرخی نەوت دابەزێت و کورتهێنانێکی زۆر لە عێراقدا دروست ببێت». ئاماژەی بەوەشدا کە عێراق بە ڕێژەی ٨٩٪ پشت بە داهاتی نەوت دەبەستێت. بڕیارە هەفتەی داهاتوو ئەنجومەنی نوێنەرانی عێراق بۆ تاوتوێکردنی ئەم پرسە میوانداریی پارێزگاری بانکی ناوەندی بکات.
بازێکی گەورەی زێڕ
پێچەوانەی دراو و نەوت، بازاڕی کانزا زەردەکە گەرمە. نرخی یەک ئۆنسە زێڕ لە بازاڕەکانی جیهاندا بۆ ٤ هەزار و ٤٦٩ دۆلار بەرزبووەوە. ئەم بەرزبوونەوەیە کاریگەری راستەوخۆی لەسەر بازاڕەکانی هەرێم هەبووە و نرخەکان بەم شێوەیەن:
یەک مسقاڵ زێڕی عەیارە ٢٤: ١,٠٦٣,٠٠٠ دینار
یەک مسقاڵ زێڕی عەیارە ٢٢: ٩٨١,٠٠٠ دینار
یەک مسقاڵ زێڕی عەیارە ٢١: ٩٣٦,٠٠٠ دینار
یەک مسقاڵ زێڕی عەیارە ١٨: ٨٠٢,٠٠٠ دینار
دابەزینی نرخی نەوت
لە بازاڕی وزەدا، نرخی نەوت دابەزینی بەخۆیەوە بینیوە. یەک بەرمیل نەوتی خاوی برێنت بە ٦١ دۆلار و ٦١ سەنت مامەڵەی پێوەدەکرێت، هەروەها نەوتی خاوی تەکساس بۆ ٥٨ دۆلار و ١٣ سەنت دابەزیوە. بەرزبوونەوەی یەدەگی نەوتی ئەمریکا و نیگەرانییەکان لە دابینکردنی جیهانی، هۆکاری سەرەکی ئەم دابەزینەن، سەرەڕای ئەوەی ئەگەرەکانی سزادانی كەرتی نەوتی ڤەنزوێلا لەلایەن ئەمریکاوە وەک ئەگەرێکی لاواز بۆ بەرزکردنەوەی نرخەکان دەبینرێت.