لەکاتێکدا شەپۆلێکی نوێی ناڕەزایەتی شارەکانی ئێران و ڕۆژهەڵاتی کوردستانی گرتووەتەوە، حزبە سیاسییەکانی ڕۆژهەڵاتی کوردستان لە کۆبوونەوەیەکی لوتکەدا بڕیاریاندا ڕیزەکانیان یەکبخەن و هەنگاوی کرداری بۆ پشتیوانی لە ڕاپەڕینی خەڵک بنێن. هاوکات ڕێکخراوەکانی مافی مرۆڤ ئاماری قوربانییانی هەفتەی یەکەمی ناڕەزایەتییەکانیان ئاشکرا کرد.

کۆبوونەوەی لوتکەی حزبەکان

ناوەندی دیالۆگ بۆ هاوکاریی حزبەکانی کوردستانی ئێران ڕایگەیاند، ڕۆژی دووشەممە ٥ی کانوونی دووەمی ٢٠٢٦، کۆبوونەوەی باڵای حیزبە سیاسییەکانی ڕۆژهەڵات بەڕێوەچوو. لە کۆبوونەوەکەدا کە نوێنەرانی زۆربەی حزبە سەرەکییەکان تێیدا بەشداربوون، بارودۆخی سیاسیی ئێران و دواین گۆڕانکارییەکان تاوتوێ کران.

بەپێی ڕاگەیەندراوی کۆبوونەوەکە، لایەنەکان بڕیاریانداوە لەسەر «کاری هاوبەش و بەرهەمدار» بۆ بەهێزکردنی بزووتنەوەی ناڕەزایەتی و بەرپەرچدانەوەی سیاسەتەکانی کۆماری ئیسلامی. هەروەها جەخت لەسەر داڕشتنی نەخشەڕێگایەک کراوەتەوە بۆ بەهێزکردنی بزووتنەوەی سیاسی و نەتەوەیی کورد.

بەشداربووانی کۆبوونەوەکە بریتی بوون لە: حیزبی دێموکراتی کوردستانی ئێران، کۆمەڵە (باڵە جیاوازەکان)، پارتی ژیانی ئازادی کوردستان (PJAK)، پارتی ئازادیی کوردستان (PAK) و سازمانی خەبات.

ئاماری قوربانییەکان

هاوکات لەگەڵ هەوڵە سیاسییەکان، ڕێکخراوی مافی مرۆڤی «هەنگاو» لە نوێترین ڕاپۆرتیدا ئاشکرای کرد کە لە ماوەی هەفتەی ڕابردوودا و لەگەڵ دەستپێکردنی شەپۆلی نوێی ناڕەزایەتییەکان، ناسنامەی ١٧ کوژراویان پشتڕاست کردووەتەوە.

بەگوێرەی ئامارەکە، زۆربەی قوربانییەکان خەڵکی ناوچە کوردستانی و لوڕنشینەکانن. لە کۆی ١٧ کوژراو، ٩ کەسیان هاووڵاتیی لۆڕ و ٧ کەسیان کوردن و هاووڵاتییەکی فارسیش لە هەمەدان گیانی لەدەستداوە. شارەکانی (مەلەکشاهی، هەمەدان، هەرسین، نووراوا، کۆدەشت و لۆردەگان) زۆرترین توندوتیژییان تێدا تۆمار کراوە.

حزبەکانی ڕۆژهەڵات لە پەیامەکەیاندا داوای یەکڕیزی لە سەرجەم گەلانی ئێران دەکەن و پشتیوانی خۆیان بۆ «خەبات و ڕاپەڕینی سەراسەری» دووپات کردووەتەوە.