وەزارەتی دارایی و ئابووریی حکومەتی هەرێمی کوردستان ڕایگەیاند، ڕۆژی سێشەممە ٢٧ی کانوونی دووەمی ٢٠٢٦، لیستی مووچەی مانگی یەکی فەرمانبەران و مووچەخۆرانی هەرێمی کوردستان لەلایەن تیمی تەکنیکی وەزارەتەوە ڕەوانەی بەغدا کراوە. بڕیارە ئەمڕۆ چوارشەممە، لیستەکە بە فەرمی ڕادەستی فەرمانگەی ژمێریاریی وەزارەتی دارایی حکومەتی فیدراڵ بکرێت بۆ وردبینی و خەرجکردنی.

مەرجی توند بۆ وەرگرتنی مووچە

هاوتەریب لەگەڵ ناردنی لیستەکە، ئاوات شێخ جەناب، وەزیری دارایی و ئابووری لە کۆبوونەوەیەکدا لەگەڵ تیمی سەرپەرشتیاری پڕۆژەی «هەژماری من»، جەختی کردەوە لەسەر جێبەجێکردنی بڕیاری ڕاگرتنی مووچەی مانگی یەکی ئەو فەرمانبەر و مووچەخۆرانەی کە خۆیان لە پڕۆژەکەدا تۆمار نەکردووە، یان کارتی بانکییان وەرنەگرتووەتەوە.

بەپێی ئامارەکانی وەزارەت، تا ئێستا زیاتر لە یەک ملیۆن فەرمانبەر لە پڕۆژەکەدا تۆمار کراون و بۆ مووچەی ئەم مانگە نزیکەی ٧٠٠ هەزار مووچەخۆر لە ڕێگەی «هەژماری من»ـەوە مووچە وەردەگرن.

کێشەی بانکەکان و TBI

لە کۆبوونەوەکەدا تاوتوێی کێشەکانی بانکی بازرگانیی عێراق (TBI) کرا، کە بەدەست کێشەی تەکنیکی و کەمیی ئامێری ڕاکێشانی پارەوە دەناڵێنێت. بڕیار دراوە ئەو فەرمانبەرانەی لەو بانکە تووشی گرفت بوون، بەشێوەی ئارەزوومەندانە بگوازرێنەوە سەر بانکی دڵخوازی دووەمیان. هەروەها هۆشداری دراوەتە ئەو بانکانەی کە ئامێرەکانیان (ATM) پارەی تێدا نامێنێت یان خزمەتگوزارییان خراپە، کە ڕووبەڕووی سزا دەبنەوە.

دۆخی دارایی بەغدا و هەرێم

ناردنی لیستی مانگی یەک لە کاتێکدایە کە چارەنووسی مووچەی مانگەکانی ١١ و ١٢ی ساڵی ڕابردووی فەرمانبەرانی هەرێم هێشتا بە نادیاری ماوەتەوە. بەپێی زانیارییەکان، لە ئێستادا سێ لیستی مووچەی هەرێم لە بەغدان. هاوکات سەرچاوەکان لە وەزارەتی دارایی عێراق ئاشکرایان کردووە کە بەهۆی نەبوونی نەختینە و پرۆسەی وردبینیی کۆتایی ساڵ، هێشتا مووچەی بەشێکی زۆری وەزارەتەکانی عێراقیش بۆ مانگی یەک دابەش نەکراوە.

پەرلەمانتارانی کورد لە بەغدا ڕەخنە لە دواکەوتنی ناردنی لیستەکە دەگرن؛ سروە محەمەد، پەرلەمانتاری یەکێتی ڕایگەیاند: «دەبوو حکومەتی هەرێم هەفتەیەک بەر لە ئێستا لیستەکە و ١٢٠ ملیار دینار داهاتی ناوخۆی بناردایە تاوەکو لەگەڵ دابەشکردنی مووچەی عێراق، پشکی هەرێمیش بنێردرایە».