ئەمڕۆ یەکشەممە ٤ی کانوونی دووەمی ٢٠٢٦، لە کاتی دەوامی فەرمیدا ئاگر لە قوتابخانەی بنەڕەتی گوندی شەرەفۆنا لە سنووری ناحیەی بجیل سەربە قەزای ئاکرێ کەوتەوە.
عەقید ئیبراهیم فەریق، بەڕێوەبەری بەرگری شارستانی ئاکرێ سەبارەت بە هۆکاری رووداوەکە رایگەیاند: «کاتێک نەوت کراوەتە سۆپاوە نەکوژێندراوەتەوە، ئەوە هۆکاری ئاگرکەوتنەوەکە بوو».
بەپێی زانیارییەکان، رووداوەکە لە کاتێکدا بووە کە قوتابییان لە پۆلەکاندا بوون، بەڵام مامۆستایان توانیویانە بە خێرایی قوتابییەکان ببەنە دەرەوە و گیانیان رزگار بکەن. هاوکات تیمەکانی بەرگری شارستانی بە خێرایی گەیشتوونەتە شوێنی رووداوەکە و ئاگرەکەیان کۆنترۆڵ کردووە.
سەبارەت بە دەرەنجامەکان، بەرگری شارستانی ئاکرێ جەختی کردەوە کە رووداوەکە هیچ زیانێکی گیانی لێنەکەوتووەتەوە، بەڵام بەشێکی باڵەخانەی قوتابخانەکە سووتاوە و زیانی ماددی بەرکەوتووە.