بە بڕیاری مەکتەبی سیاسیی پارتی دیموکراتی کوردستان، ئەمڕۆ یەکشەممە ٤ی کانوونی دووەمی ٢٠٢٦، گۆڕانکاری لە سەرۆکایەتیی فراکسیۆنی پارتی لە ئەنجومەنی نوێنەرانی عێراق کرا و شاخەوان عەبدوڵڵا وەک سەرۆکی نوێی فراکسیۆنەکە دەستنیشان کرا.
بەگوێرەی زانیارییەکان، شاخەوان عەبدوڵڵا لە شوێنی فەرهاد ئەترووشی دەستبەکار دەبێت، کە ئەمەی دواییان وەک کاندیدی پارتی بۆ پۆستی جێگری دووەمی سەرۆکی پەرلەمانی عێراق دیاری کراوە. سیپان شێروانی، ئەندامی فراکسیۆنی پارتی لە بەغدا هەواڵەکەی پشتڕاستکردووەتەوە و رایگەیاندووە: «شاخەوان عەبدوڵڵا، دەبێتە سەرۆکی فراکسیۆنی پارتی لە ئەنجومەنی نوێنەرانی عێراق».
هۆکاری گۆڕانکارییەکان
ئەم بڕیارە دوای ئەوە دێت کە لە کۆتایی مانگی رابردوودا (٣٠ی کانوونی یەکەمی ٢٠٢٥)، پارتی دیموکراتی کوردستان بڕیاریدا شاخەوان عەبدوڵڵا لە کاندیدبوون بۆ پۆستی جێگری دووەمی سەرۆکی پەرلەمانی عێراق بکشێنێتەوە و فەرهاد ئەترووشی لە شوێنی ئەو کاندید بکات. شاخەوان عەبدوڵڵا لە لێدوانێکدا رایگەیاندووە: «بە بڕیاری سەرۆک بارزانی بۆ ئەم قۆناغە وەکو سەرۆکی فراکسیۆنی پارتی لە پەرلەمانی عێراق کار دەکەم».
پاشخانی سیاسی
شاخەوان عەبدوڵڵا لە خولی پێنجەمی ئەنجومەنی نوێنەران پۆستی جێگری دووەمی سەرۆکی پەرلەمانی هەبووە و لە هەڵبژاردنی خولی شەشەمیشدا سەرۆکی لیستی پارتی بوو لە پارێزگای کەرکووک. گۆڕانکارییەکە لە چوارچێوەی ڕێکخستنەوەی کارەکانی فراکسیۆنی پارتییە لە بەغدا.