کۆمسیۆنی فریاگوزاری و بووژاندنەوەی چەمچەماڵ وادەی دابەشکردنی قەرەبووی ئەو ئۆتۆمبێلانەی ڕاگەیاند کە بەهۆی لافاوەکەی ئەم دواییەوە زیانیان بەرکەوتووە، هاوکات وەزارەتی خوێندنی باڵا بڕیارێکی لە بەرژەوەندی خوێندکارانی سنوورەکە دەرکرد.
عەتا محەمەد، سەرپەرشتیاری کۆمسیۆنی فریاگوزاری و بووژاندنەوەی چەمچەماڵ ڕایگەیاند، ڕۆژی چوارشەممە کاتژمێر ٩:٠٠ی بەیانی لە هۆڵی سالار فەقێ، دەست بە دابەشکردنی چەکی پارە بەسەر خاوەنی ٦٩٣ ئۆتۆمبێلی زیانلێکەوتوودا دەکرێت. ئاماژەی بەوەشکرد کە کەمترین بڕی قەرەبوو ١٠٠ هەزار دینار دەبێت و بڕەکە بەپێی جۆری ئۆتۆمبێل، مۆدێل و ئاستی زیانەکە لەلایەن لیژنەی پسپۆڕی هاتووچۆوە دیاری کراوە.
مەرجەکانی وەرگرتنی قەرەبوو
لیژنەکە داوا لە خاوەن ئۆتۆمبێلەکان دەکات بۆ وەرگرتنی قەرەبووەکانیان، پێویستە مۆڵەتی شۆفێری، ساڵانەی ئۆتۆمبێل و کارتی نیشتمانی هەموو ئەندامانی خێزانەکەیان پێ بێت.
لە لایەکی دیکەوە، ئاسۆ بەکر، قایمقامی چەمچەماڵ ڕایگەیاند کە زیاتر لە ١٤ ملیار دینار کۆکراوەتەوە و هەر بڕە پارەیەک دوای قەرەبووەکان بمێنێتەوە، بۆ پڕۆژەی خزمەتگوزاری وەک دروستکردنی قوتابخانە و چاککردنی کارەبا خەرج دەکرێت. بڕیارە هەفتەی داهاتوو دەست بە دروستکردنی دوو قوتابخانەی ١٨ پۆلی لە چەمچەماڵ و تەکیە بکرێت.
لێخۆشبوون لە کرێی خوێندن
هاوتەریب لەگەڵ قەرەبووە ماددییەکان، وەزارەتی خوێندنی باڵا و توێژینەوەی زانستی بڕیاریدا بە لێخۆشبوون لە تەواوی کرێی خوێندنی ساڵی ٢٠٢٥-٢٠٢٦ بۆ خوێندکارانی دانیشتووی چەمچەماڵ. بڕیارەکە خوێندنی بەرایی و باڵا (پارالێل و ئێواران) دەگرێتەوە و لە ڕێگەی سیستمی زانکۆلاینەوە بەپێی کۆدی تاقیکردنەوەکان جێبەجێ دەکرێت.