دەرگای خۆپاڵاوتن بۆ پۆستی سەرۆک کۆماری عێراق داخرا و ململانێکان پێ دەنێنە قۆناغێکی یەکلاکەرەوەوە. بەپێی دواین ئامارە فەرمییەکانی پەرلەمانی عێراق، لە کۆی ٤٥ کەس کە فۆڕمی خۆپاڵاوتنیان پڕکردووەتەوە، ١٣ کەسیان کوردن و ململانێی سەرەکی لەنێوان کاندیدانی حزبە دەسەڵاتدارەکان و کاندیدە سەربەخۆکاندایە.
سەرەڕای هەوڵە چڕەکان بۆ گەیشتن بە سازان، هەریەکە لە پارتی دیموکراتی کوردستان و یەکێتیی نیشتمانیی کوردستان نەگەیشتنە ڕێککەوتن و بە کاندیدی جیا دەچنە بەغدا. بەپێی زانیارییەکان، نزار ئامێدی وەک تاکە کاندیدی فەرمیی یەکێتی و فوئاد حوسێن وەک کاندیدی پارتی دیاری کراون. هاوکات د. لەتیف ڕەشید، سەرۆک کۆماری ئێستا، بەهیوای بەدەستهێنانەوەی متمانە بۆ خولی دووەم خۆی کاندید کردووەتەوە و مەلا بەختیاریش وەک دواین کەس فۆڕمەکەی پڕکردووەتەوە و وەک «کاندیدی هاوبەش» خۆی دەناسێنێت.
سەرچاوەکان ئاشکرایان کردووە کە لە ڕۆژانی ڕابردوودا ئاڵوگۆڕی پهیام لەنێوان هەردوو حزب هەبووە. هۆشیار زێباری، ئەندامی مەکتەبی سیاسیی پارتی سەردانی سلێمانی کردووە و لەگەڵ بافڵ تاڵەبانی کۆبووەتەوە. پەیامەکەی پارتی بریتی بووە لە پێشنیاری «پاکێجێک» بۆ ڕێککەوتن لەسەر سەرۆک کۆمار و پێکهێنانی کابینەی دەیەمی حکومەتی هەرێم لە ماوەی مانگێکدا، بەڵام ئەم هەوڵانە بێ ئەنجام بوون.
لەلایەکی دیکەوە، فایەق زێدان، سەرۆکی ئەنجومەنی باڵای دادوەریی عێراق، پەیامی بۆ سەرۆک مەسعود بارزانی ناردووە و داوای کردووە کورد بە یەک کاندید بچنە بەغدا بۆ ئەوەی چوارچێوەی هەماهەنگی (لایەنە شیعییەکان) تووشی «ئیحراجی» نەبێت لە یەکلاکردنەوەی پۆستەکەدا. هەروەها محەمەد حاجی مەحمود داوای کردووە کورد یەک هەڵوێست بن بۆ ئەوەی سیناریۆی جێگری سەرۆکی پەرلەمان دووبارە نەبێتەوە.
بەپێی بەدواداچوونەکان، لیستی کاندیدە کوردەکان بریتییە لە: (مەلا بەختیار، نزار ئامێدی، فوئاد حوسێن، لەتیف ڕەشید، موسەننا ئەمین، عەبدوڵا عەلیاوایی، د. جوان فوئاد مەعسوم، ئومێد پاڵانی، حاكم ڕزگار، حسێن سنجاری، شوان داودی، ئاسۆ فەرەیدون و د.دڵشاد محەمەد).