دوای تێپەڕبوونی نزیکەی مانگێک بەسەر لافاوەکەی چەمچەماڵدا، هەوڵەکان بۆ قەرەبووکردنەوەی زیانلێکەوتووان چووەتە قۆناغی جێبەجێکردنەوە، لە کاتێکدا کەرتی پەروەردە لەو سنوورە هێشتا بەدەست کاریگەرییەکانەوە دەناڵێنێت.

لێخۆشبوون لە کرێی خوێندن

وەزارەتی خوێندنی باڵا و توێژینەوەی زانستی بە فەرمانێکی وەزاری بڕیاریدا لە کرێی خوێندنی ئەمساڵی خوێندکارانی سنووری قەزای چەمچەماڵ و ناوچە زیانلێکەوتووەکان خۆشبێت. ئەم بڕیارە جێبەجێکردنی ئەو بەڵێنەیە کە ئارام محەممەد، وەزیری خوێندنی باڵا لە کاتی سەردانیکردنی ناوچەکەدا دابووی. بۆ ئاسانکاریی خوێندکاران، بڕیارەکە ڕۆتینی تێدا نییە و پێویست بە هیچ نووسراوێک ناکات؛ بەڵکو لە ڕێگەی داتاکانی «زانکۆلاین» و بە هەماهەنگی نێوان تۆماری گشتی و بەشی دارایی زانکۆکان جێبەجێ دەکرێت.

قەرەبووی ئۆتۆمبێلەکان

هاوکات کۆمیسیۆنی فریاگوزاری و بووژاندنەوەی چەمچەماڵ ئەمڕۆ کۆدەبێتەوە بۆ یەکلاییکردنەوەی میکانیزمی دابەشکردنی هاوکارییەکان. بەپێی زانیارییەکان، بڕیارە سبەینێ سێشەممە دەست بە دابەشکردنی قەرەبووی دارایی بۆ خاوەنی ئەو ئۆتۆمبێلانە بکرێت کە زیانیان بەرکەوتووە. ئامارەکان دەریدەخەن لە لافاوەکەی ٩ی کانوونی یەکەمی ٢٠٢٥دا، نزیکەی ٧٠٠ ئۆتۆمبێل و ١٣٠٢ ماڵ زیانیان بەرکەوتووە.

گرفتە بەردەوامەکانی کەرتی پەروەردە

سەرەڕای هەوڵەکانی قەرەبووکردنەوە، دۆخی خوێندن لە چەمچەماڵ هێشتا ئاسایی نەبووەتەوە. قاسم عەلی، بەڕێوەبەری پەروەردەی چەمچەماڵ ڕایگەیاندووە کە بەهۆی نۆژەننەکردنەوەیان، سێ قوتابخانە هێشتا پرۆسەی خوێندنیان تێدا دەستیپێنەکردووەتەوە. بۆ قەرەبووکردنەوەی وانە فەوتاوەکانیش، پێشنیاز کراوە ڕۆژانی شەممە بکرێتە دەوام بۆ پۆلەکانی ٩ی بنەڕەتی و ١٢ی ئامادەیی.

خوێندن لەناو کابینەدا

کێشەکە تەنها لافاو نییە؛ بەپێی ئامارەکانی پەروەردەی چەمچەماڵ، نزیکەی ٢٠٠٠ قوتابی لە سنووری چەمچەماڵ، شۆڕش و تەکیە بەهۆی کەمیی بیناوە لەناو کابینەدا دەخوێنن. قوتابخانەکانی (دیدەن، پاداشت، ڕەند) و چەند قوتابخانەیەکی دیکە بەشێکن لەو ناوەندانەی کە خوێندکاران تێیدا لە دۆخێکی نەگونجاودا درێژە بە خوێندن دەدەن.