کۆمپانیای ئاسیاسێڵ لە ڕاگەیەندراوێکی فەرمیدا ئاشکرای کرد کە تەواوی پابەندبوونە دارایی و یاساییەکانی بەرامبەر بە حکومەتی عێراق جێبەجێ کردووە و وەک بەشێک لە پڕەنسیپەکانی شەفافیەت، هیچ پابەندبوونێکی دارایی لەسەر شان نەماوە.
بەگوێرەی ڕاگەیەندراوەکەی کۆمپانیاکە کە ئەمڕۆ دووشەممە ٥ی کانوونی دووەمی ٢٠٢٦ بڵاوکراوەتەوە، ئاماژە بەوە کراوە کە لەگەڵ کۆتاییهاتنی ساڵی ٢٠٢٥، ئاسیاسێڵ هەموو ئەو شایستە و پابەندبوونە داراییانەی لە ئەستۆیدا بووە، لە چوارچێوەی ڕێکارە بەرکار و پەسەندکراوەکاندا لەگەڵ لایەنە حکومییە پەیوەندیدارەکان پاکتاو کردووە.
لە بەشێکی ڕاگەیەندراوەکەدا هاتووە: «ئاسیاسێڵ ڕوونی دەکاتەوە کە لە ئێستادا هیچ پابەندبوونێکی دارایی لە ئەستۆی کۆمپانیادا نییە بەرامبەر بە حکومەتی عێراقی، ئەمەش لە چوارچێوەی پابەندبوونی بەردەوامیدا بە شەفافیەت و دیسپلینی دارایی و کارکردن بەگوێرەی ڕێکارە یاساییەکان».
کۆمپانیاکە جەختی کردووەتەوە کە ئەم هەنگاوە هاوشان و هاوتەریبە لەگەڵ ڕۆڵی ئاسیاسێڵ وەک «هاوبەشێکی نیشتمانی بەرپرسیار»، کە بەشداری دەکات لە پشتیوانیکردنی ئابووریی نیشتمانی و بەهێزکردنی گەنجینەی دەوڵەت، هاوشێوەی ئەوەی لە ساڵە داراییەکانی ڕابردوودا ئەنجامی داوە.