بەگوێرەی زانیارییەکان، ئێوارەی ڕۆژی پێنجشەممە ١ی کانوونی دووەمی ٢٠٢٦، گەنجێک لە شارەدێی وەرتێی سەر بە ئیدارەی سۆران، لەکاتی هەوڵدان بۆ کارپێکردنی مۆلیدەی ماڵەکەیان لە سەربان کەوتە خوارەوە و گیانیلەدەستدا.
گەنجەکە ناوی «شاکر عەبدوڵا»یە و دانیشتووی شارەدێی وەرتێیە. بە وتەی کەسوکارەکەی، رووداوەکە لەکاتێکدا بووە کە کارەبای نیشتمانی بڕاوە و ناوبراو ویستوویەتی مۆلیدە کارپێبکات، بەڵام بەهۆی ئەوەی سەربانەکەیان خلیسک بووە (بەهۆی بەفرەوە)، کۆنترۆڵی لەدەستداوە و کەوتووەتە خوارەوە.
شایەتحاڵەکان ئاماژەیان بەوە کردووە کە گەنجەکە دوای کەوتنی، ماوەیەک ماوەتەوە و خوێنێکی زۆری لێ رۆیشتووە تاوەکو کەسوکارەکەی پێیان زانیوە و گەیاندوویانەتە نەخۆشخانە. پزیشکی دادی سۆران پشتڕاستی کردەوە کە تەرمی گەنجێک گەیەندراوەتە لایان کە بەهۆی کەوتنەخوارەوە لە بەرزایی گیانیلەدەستداوە و توێکاری بۆ دەکرێت.
ئەمە دووەمین ڕووداوی گیانلەدەستدانە لە وەرتێ کە پەیوەندی بە کێشەی کارەباوە هەبێت لەماوەی چەند مانگی ڕابردوودا. پێشتر و لە ڕۆژی ٢١ی تەمموزی ٢٠٢٥، گەنجێکی دیکە بەناوی «حەسەن ڕەحمان» لەکاتی گردبوونەوەی ناڕەزایەتی دژی نەبوونی کارەبا و خزمەتگوزارییەکان، گیانیلەدەستدابوو.