لەتیف نێروەیی، لێپرسراوی بۆردی راگەیاندنی یەکێتیی نیشتمانیی کوردستان، لە پەیامێکی تونددا هێرش دەکاتە سەر سیاسەتی میدیایی پارتی دیموکراتی کوردستان و رایدەگەیەنێت کە ئەوان بەردەوامن لەسەر «فاوڵەکانیان» لەڕێگەی بڵاوکردنەوەی ناوی جیاواز وەک کاندیدی سەرۆککۆمار.
نێروەیی لە وتارێکدا کە لە میدیای فەرمیی حزبەکەی بڵاویکردووەتەوە، ئاماژە بەوە دەکات کە سەرەڕای روونکردنەوە فەرمییەکان، میدیای پارتی ڕۆژانە ناوی سەرکردەیەکی یەکێتی دەهێنێت گوایە کاندید کراوە و تەنانەت «هەر خۆشیان کۆمەڵێک مەرج باس دەکەن»، ئەمەش وەک بەشێک لە هەڵمەتێکی سیاسی و میدیایی لێکدەداتەوە.
جەختکردنەوە لە نەبوونی کاندیدی فەرمی
بەرپرسی بۆردی راگەیاندنی یەکێتی وەبیر میدیاکانی پارتی دەهێنێتەوە کە پێشتر وتەبێژی فەرمیی یەکێتی و قوباد تاڵەبانی لە کۆنگرەی ڕۆژنامەوانیدا پرسی کاندیدی سەرۆککۆماریان یەکلاکردووەتەوە. نێروەیی دەنووسێت: «قوباد تاڵەبانی لە وەڵامی پرسیارێکدا وتی: ئایا سەرۆک بافڵ یان یەکێتی بە ڕەسمی ناوی کەسێکی هێناوە کە کاندید بکرێت؟ وتیان نەخێر، وتی: کەواتە هێشتا یەکێتی کاندیدەکەی خۆی دەستنیشان نەکردووە».
هۆشداری لە کاردانەوەی یەکێتی
لەتیف نێروەیی لە بەشێکی دیکەی وتارەکەیدا هۆشدارییەکی ڕاشکاوانە دەداتە میدیای بەرامبەر و رایدەگەیەنێت کە ئەم جۆرە پەیامانە دەچنە خانەی «نابەرپرسیارێتیی میدیایی» و مەرامیان تەنها لێدانە لە کەسایەتیی سەرکردەکان. ناوبراو دەڵێت: «گەرەکە میدیای پارتی لەمە زیاتر پەیامی نابەرپرسیارانە بڵاونەکاتەوە، چونکە بەردەوامبوون لەسەر ئەم کارە دەبێتە هاندەر و پاڵنەر کە میدیای یەکێتیش وەکو کاردانەوە هاوشێوەی ئەوان هەنگاوبنێت»، کە ئەمەش ئاماژەیە بۆ ئەگەری گۆڕینی سیاسەتی میدیایی یەکێتی بەرامبەر سەرکردەکانی پارتی ئەگەر دۆخەکە بەم شێوەیە بەردەوام بێت.