شەوی ڕابردوو و لە کاتی ئاهەنگگێڕان بە بۆنەی سەری ساڵی نوێوە، تەقینەوەیەکی بەهێز لە یانەیەکی شەوانە لە شارۆچکەی گەشتیاریی «کرانس مۆنتانا» لە زنجیرە چیاکانی ئەلپ لە باشووری سویسرا ڕوویدا. بەپێی زانیارییە سەرەتاییەکان، ڕووداوەکە ژمارەیەکی زۆر قوربانیی لێکەوتووەتەوە.

وردەکاریی ڕووداوەکە و ژمارەی قوربانیان

تەقینەوەکە دەوروبەری کاتژمێر ١:٣٠ی بەرەبەیان بە کاتی ناوخۆ (٣:٣٠ بە کاتی هەولێر) لە یانەی «لۆ کۆنستێلاسیۆن» (Le Constellation) ڕوویداوە، کە شوێنێکی جەنجاڵ بووە بەهۆی ئاهەنگەکانەوە. ڕۆژنامەی «لۆ نۆڤێلیست»ی سویسری لە زاری سەرچاوەیەکەوە بڵاوی کردووەتەوە کە ژمارەی کوژراوان گەیشتووەتە نزیکەی ٤٠ کەس و نزیکەی ١٠٠ کەسی دیکەش بریندار بوون. لە بەرامبەردا، هەندێک سەرچاوەی دیکە وەک «شار پرێس» ئاماژە بە گیانلەدەستدانی ١٠ کەس دەکەن. پۆلیسی کانتۆنی ڤالایس (Valais) بوونی قوربانییانی پشتڕاست کردووەتەوە، بەڵام هێشتا ژمارەی فەرمیی کوژراوانی ڕانەگەیاندووە و ئاماژەی بەوە داوە کە لێکۆڵینەوە لە ئامارە وردەکان بەردەوامە.

هۆکاری تەقینەوەکە

دەزگای هەواڵی «بلیک»ی سویسری ڕایگەیاندووە کە ڕەنگە هۆکارەکە بەکارهێنانی یاریی ئاگرین بووبێت لە ناو یانەکەدا کە بووەتە هۆی ئاگرکەوتنەوە و تەقینەوە، هەرچەندە پۆلیس هێشتا بە فەرمی هۆکارەکەی دەستنیشان نەکردووە. تیمەکانی فریاگوزاری و هێلیکۆپتەر و ئەمبوڵانس بە خێرایی گەیشتوونەتە شوێنی ڕووداوەکە بۆ گواستنەوەی بریندارەکان.

کرانس مۆنتانا یەکێکە لە شوێنە گەشتیارییە بەناوبانگەکانی سویسرا بۆ خلیسکێنەی سەر بەفر و نزیکەی دوو کاتژمێر لە بێرنی پایتەختەوە دوورە. ئەم ڕووداوە لە وڵاتێکدا کە بە یەکێک لە ئارامترین وڵاتانی جیهان دادەنرێت، شۆکێکی گەورەی دروست کردووە.