ئێوارەی ئەمڕۆ شەممە ٣ی کانوونی دووەمی ٢٠٢٦، لە گەڕەکی هوانەی شاری سلێمانی ئاگر لە ماڵێک کەوتەوە و بەهۆیەوە ژنێک گیانی لەدەستدا.
ئارام عەلی، وتەبێژی بەرگری شارستانی سلێمانی لەبارەی ڕووداوەکەوە ڕایگەیاند، نزیکەی کاتژمێر ٤:٣٠ی ئێوارە ئاگادار کراونەتەوە لە بوونی ئاگرێک لە ماڵێکدا لە گەڕەکی هوانە. دەستبەجێ تیمەکانی ئاگرکوژێنەوە گەیشتوونەتە شوێنی ڕووداوەکە و توانیویانە ئاگرەکە کۆنترۆڵ بکەن.
بەپێی زانیارییەکان، ئەو ژنەی گیانی لەدەستداوە تەمەنی ٣٣ ساڵ بووە و لە کاتی ڕووداوەکەدا بە تەنها لە ماڵەوە بووە. وتەبێژی بەرگری شارستانی ئاماژەی بەوە کردووە کە ئاگرەکە تەنها لە بەشی مەتبەخی ماڵەکەدا کەوتووەتەوە.
دوای کۆنترۆڵکردنی ئاگرەکە، تیمەکانی بەرگری شارستانی دەستیان بە لێکۆڵینەوە کردووە بۆ زانینی هۆکاری سەرەکی کەوتنەوەی ئاگرەکە، کە تا ئێستا دیار نییە.