ئەمڕۆ یەکشەممە ٤ی کانوونی دووەمی ٢٠٢٦، شاندێکی باڵای هێزەکانی سوریای دیموکرات (هەسەدە) بە سەرۆکایەتی مەزڵوم عەبدی، فەرماندەی گشتیی هێزەکە گەیشتە دیمەشق و لەگەڵ بەرپرسانی باڵای حکومەتی سوریا لە کۆبوونەوەدایە. ئامانجی سەردانەکە گفتوگۆکردنە لەسەر میکانیزمی جێبەجێکردنی ڕێککەوتنی ١٠ی ئازاری ٢٠٢٥ و پرسی یەکگرتنی سەربازی.
بەپێی زانیارییەکان، شاندەکەی هەسەدە جگە لە مەزڵوم عەبدی، هەریەکە لە سیپان حەمۆ و سۆزدار دێرک، لە فەرماندە باڵاکانی هێزەکانی سوریای دیموکراتی لەخۆدەگرێت. لە پێشهاتێکی گرنگدا، سەرچاوەکان ئاشکرایان کردووە کە عەمید «کیڤن لامبێرد»، فەرماندەی گشتیی هێزەکانی هاوپەیمانان لە عێراق و سوریا، لە کۆبوونەوەی باڵای نێوان شاندی هەسەدە و حکومەتی سوریادا ئامادە دەبێت، کە ئەمەش ئاماژەیە بۆ چاودێری نێودەوڵەتی بەسەر پڕۆسەی تێکەڵکردنەوەکەدا.
تەوەری سەرەکیی گفتوگۆکانی ئەمڕۆ بریتییە لە پرسی ئینتیگراسیۆن و تێکەڵکردنەوەی هێزەکانی هەسەدە لەگەڵ سوپای سوریا لە چوارچێوەی قۆناغی ڕاگوزەردا. پێشتر پرسی شێوازی فەرماندەییکردن و سەربەخۆیی پێکهاتەی هەسەدە یەکێک بووە لە خاڵە ناکۆکەکان، بەڵام مەزڵوم عەبدی لە ڕۆژانی ڕابردوودا ڕایگەیاندبوو: «هەردوولا دەربارەی پرسی ئینتیگراسیۆن و تێکەڵبوونی سەربازیی گەیشتووینەتە ڕوانگەیەکی هاوبەش».
پاشخانی ئەم جموجۆڵە دەگەڕێتەوە بۆ ڕێککەوتننامەی ١٠ی ئازاری ٢٠٢٥ بۆ یەکخستنی هێزەکان. بڕیاربوو ئەم سەردانەی شاندی هەسەدە لە ٢٩ی مانگی ڕابردوو ئەنجام بدرایە، بەڵام بەهۆی «هۆکاری تەکنیکی» بۆ ئەمڕۆ دواخرا. ساڵح موسلیم، ئەندامی دەستەی هاوسەرۆکایەتی پەیەدە پێشتر ئومێدی خۆی نیشانداوە کە ئەم گفتوگۆیانە لە دۆسیەی سەربازییدا دەرئەنجامی باشی هەبێت، هاوکات مەزڵوم عەبدی ساڵی ٢٠٢٦ی بە «ساڵی سەرکەوتن» ناوبردووە.