ئەمڕۆ یەکشەممە ٤ی کانوونی دووەمی ٢٠٢٦، کۆبوونەوەی باڵای نێوان شاندی هێزەکانی سوریای دیموکرات (هەسەدە) بە سەرۆکایەتی مەزڵوم عەبدی و بەرپرسانی حکومەتی سووریا لە دیمەشق کۆتایی هات. تەوەرەی سەرەکی کۆبوونەوەکە تاوتوێکردنی پرسی «یەکخستنی سەربازی» و تێکەڵکردنەوەی هێزەکانی هەسەدە بوو لە چوارچێوەی مەنزومەی بەرگریی سوریادا.
هەڵوێستی فەرمی هەسەدە
دوای تەواوبوونی کۆبوونەوەکە، فەرهاد شامی، وتەبێژی هەسەدە لە پەیامێکدا لە تۆڕی کۆمەڵایەتی ئێکس ڕایگەیاند: «گفتوگۆکان بە شێوەیەکی پیشەیی و بەرپرسیارانە بەڕێوەچوون». شامی جەختی کردەوە کە وردەکاری و ئەنجامەکان دوای تەواوبوونی ڕاوێژکارییەکان بە فەرمی ڕادەگەیەنرێن و هۆشداریدا لەوەی: «هەر زانیارییەک کە لە ئێستادا بڵاودەکرێتەوە، ڕەنگدانەوەی ڕێکارەکانی کۆبوونەوەکە نییە».
ئەنجامی کۆبوونەوەکە
بەپێی میدیای فەرمی حکومەتی سووریا و سەرچاوە ئاگادارەکان، کۆبوونەوەکە «ئەنجامێکی بەرجەستەی نەبووە» بۆ جێبەجێکردنی دەستبەجێی ڕێککەوتنەکان، بەڵام هەردوولا لەسەر ئەوە ڕێککەوتوون کە کۆبوونەوەکان لە دیمەشق بەردەوام بن بۆ بەدواداچوون و جێبەجێکردنی ڕێککەوتننامەی ١٠ی ئادار. ئامانجی سەرەکی گفتوگۆکان دەستەبەرکردنی دەرئەنجامی باش بیرلێکراوەیە کە ئەولەویەت بە ئاشتی و سەقامگیری بدات.
بەشداریی نێودەوڵەتی
بەپێی زانیارییەکان، لەم کۆبوونەوەیەدا عەمید «کیڤن لامبێرد»، فەرماندەی گشتیی هێزەکانی هاوپەیمانان لە عێراق و سووریا ئامادە بووە، کە ئەمەش ئاماژەیە بۆ بوونی چاودێرییەکی نێودەوڵەتی و ئەمریکی لەسەر پرۆسەی دانوستانەکان و چارەنووسی هێزە سەربازییەکانی ڕۆژئاوای کوردستان.