بەڕێوەبەرایەتی ڕاگەیاندنی وەزارەتی گواستنەوە و گەیاندنی حکومەتی هەرێمی کوردستان ڕوونکردنەوەی دا لەبارەی ئەو دەنگۆیانەی باس لە گرانبوونی نرخی کارتەکانی مۆبایل و هێڵەکانی ئینتەرنێت دەکەن و دڵنیایی دەداتە هاوڵاتیان کە نرخەکان وەک خۆیان دەمێننەوە.
دیلان ڕەشاد، وتەبێژ و بەڕێوەبەری ڕاگەیاندنی وەزارەتی گواستنەوە و گەیاندن ڕایگەیاند: «تاوەکو ئێستا بڕیاری زیادکردنی ٢٠٪ی باجی کارتەکانی مۆبایل و ئینتەرنێت لەلایەن حکومەتی عێراقەوە بە فەرمی بۆمان نەنێردراوە». ئەم لێدوانە دوای ئەوە دێت کە بڕیارە لە ١٦ی ئەم مانگەوە حکومەتی عێراق باجی سەر کارتەکانی پەیوەندی و ئینتەرنێت بە ڕێژەی ٢٠٪ زیاد بکات.
سەبارەت بە کاریگەریی ئەم بڕیارە لەسەر هەرێمی کوردستان، دیلان ڕەشاد ڕوونیکردەوە: «تەنانەت ئەگەر زیادکردنی باجەکە لە عێراق جێبەجێ بکرێت، هەرێمی کوردستان ناگرێتەوە، چونکە کۆمپانیاکانی ئینتەرنێت لەلای ئێمە مۆڵەت و گرێبەستیان هەیە و پابەندی ڕێنماییەکانی وەزارەتی گواستنەوەی هەرێمن».
وەزارەتەکە جەختیشی کردووەتەوە کە کۆمپانیا مۆڵەتپێدراوەکانی خزمەتگوزاریی ئینتەرنێت لە هەرێمی کوردستان لەسەر نرخی پاکێجەکانی خۆیان بەردەوامن و هیچ زیادبوون و کەمبوونێک لە نرخەکاندا لەئارادا نییە.