ناوەندی ڕاگەیاندنی هێزەکانی سوریای دیموکرات (هەسەدە) ئاماری کار و چالاکییە ئەمنی و سەربازییەکانی ساڵی ٢٠٢٥ی لە باکوور و ڕۆژهەڵاتی سوریا بڵاوکردەوە. بەپێی ئامارەکە، لە ماوەی ئەمساڵدا بە هەماهەنگی لەگەڵ هاوپەیمانی نێودەوڵەتی، ١٦٣ ئۆپەراسیۆنیان دژی شانەکانی داعش ئەنجامداوە.
لە وردەکارییەکاندا هاتووە کە ٣٢ لەو ئۆپەراسیۆنانە بریتی بوون لە پێکدادانی ڕاستەوخۆ. لە ئەنجامی ئەو چالاکییانەدا، ١٤٠ چەکداری داعش دەستگیرکراون و ١٣ چەکداریش کوژراون، کە سێ کەسیان پلەی سەرکردایەتییان هەبووە. هەروەها دەست بەسەر ٧٩ بۆمبدا گیراوە و لەلایەن تیمە ئەندازیارییەکانەوە پوچەڵکراونەتەوە، هاوکات دەست بەسەر بڕێکی زۆر چەک و تەقەمەنیدا گیراوە و چەندین حەشارگە و ناوەندی ڕێکخراوەکە لەناوبراون.
ستراتیژی و مەترسییەکان
هەسەدە ئاماژەی بەوەشکردووە کە ٧٠٪ی چالاکییەکانیان لە ناوچە گوندنشینەکان بووە و ئۆپەراسیۆنەکانیان بریتی بوون لە کێوماڵکردن، هەڵکوتانە سەر حەشارگەکان و بەدواداچوونی وردی هەواڵگری بۆ شانە نوستووەکان. لە ڕاگەیەندراوەکەدا هۆشداری دراوە کە داعش لە ساڵی ٢٠٢٥دا نزیکەی ٢٢٠ هێرشی جۆراوجۆری ئەنجامداوە، کە ئەمەش نیشانەی ئەوەیە مەترسییەکانی ئەو گرووپە تیرۆریستییە هێشتا بەردەوامە و هەوڵی قۆستنەوەی هەر بۆشاییەکی ئەمنی دەدەن. هەسەدە دەڵێت: «لە چوارچێوەی بەرپرسیارێتی نیشتمانی… ئۆپەراسیۆنەکانمان بەشێک بوون لە ستراتیژییەکی بەرگری گشتگیر بۆ وشککردنەوەی سەرچاوە داراییەکانی تیرۆر».
وردەکاری وەڵامدانەوەی هێرشەکەی بەنداوی تشرین
لەلایەکی دیکەوە، هەسەدە وردەکاریی وەڵامدانەوەی هێرشێکی گرووپە چەکدارەکانی سەر بە وەزارەتی بەرگری حکومەتی دیمەشقی بڵاوکردەوە. بەپێی ڕاگەیەندراوەکە، گرووپەکانی (سوڵتان موراد، سوڵتان سلێمان شا/ئەلعهمشات و فیرقەی حەمزات) لە کاتژمێر ١١ی پێشنیوەڕۆ و ٤ی ئێوارەی سێشەممە بە فڕۆکەی بێفڕۆکەوانی خۆکوژ هێرشیان کردووەتە سەر ناوچە نیشتەجێبووەکان و گردی سیریا تێل لە نزیک بەنداوی تشرین.
هەسەدە ڕایگەیاند کە هێرشەکان زیانی گیانییان بۆ هێزەکانیان نەبووە، بەڵام لە چوارچێوەی «مافی وەڵامدانەوە و بەرگریی ڕەوا»دا شوێنی هەڵدانی درۆنەکانیان کردووەتە ئامانج و لە ئەنجامدا ئۆتۆمبێلێکی سەربازیی جۆری تۆیۆتا و پێگەیەکی سەربازیی ئەو گرووپانە تێکشکێنراون، کە بووەتە هۆی کوژران و برینداربوونی ژمارەیەک چەکدار.
پەیامی توندی تورکیا
هاوکات لەگەڵ ئەم پەرەسەندنە مەیدانییانە، وەزارەتی بەرگریی تورکیا پەیامێکی بڵاوکردەوە و ڕایگەیاند کە دژی داواکارییەکانی هەسەدەن بۆ ناناوەندی و فیدراڵیزم، بە پاساوی ئەوەی زیان بە یەکپارچەیی خاکی سوریا دەگەیەنێت. تورکیا پشتیوانی خۆی بۆ حکومەتە نوێیەکەی ئەحمەد شەرع دووپاتکردووەتەوە و ڕایگەیاندووە کە لەژێر دروشمی «یەک دەوڵەت و یەک سوپا» هەماهەنگی لەگەڵ ئەو حکومەتە دەکەن و چاودێری پرۆسەی تێکەڵکردنەوەکان دەکەن.