یەکێتیی نیشتمانیی کوردستان بە شێوەیەکی فەرمی کۆتایی بە مشتومڕەکان هێنا و «نزار ئامێدی» وەک تاکە کاندیدی حیزبەکەی بۆ وەرگرتنی پۆستی سەرۆک کۆماری عێراق دەستنیشان کرد. کاروان گەزنەیی، وتەبێژی یەکێتی ئەمڕۆ دووشەممە ٥ی کانوونی دووەمی ٢٠٢٦، لە ڕاگەیەندراوێکدا جەختی کردەوە کە ئامێدی تەنها کاندیدی فەرمیی ئەوانە بۆ ئەو پۆستە، ئەمەش لە کاتێکدایە کە ئەمڕۆ دوا وادەی یاسایی بوو بۆ پێشکەشکردنی سیڤی کاندیدەکان.

پڕۆفایلی کاندیدەکەی یەکێتی

نزار محەمەد سەعید ئامێدی، کە خاوەنی ئەزموونێکی سیاسی و ئیداریی درێژە، لە ٦ی شوباتی ١٩٦٨ لە شارۆچکەی ئامێدی سەر بە پارێزگای دهۆک لەدایکبووە. ناوبراو خێزاندارە و باوکی چوار کوڕە، دەرچووی کۆلێژی ئەندازیارییە لە زانکۆی موسڵ (بەشی میکانیک) و لە ئێستادا ئەندامی مەکتەبی سیاسی و بەرپرسی نووسینگەی مەکتەبی سیاسیی یەکێتییە لە بەغدا.

لە ڕووی ئەزموونی حکومی و نێودەوڵەتییەوە، نزار ئامێدی پۆستە باڵاکانی خوارەوەی هەبووە:

• وەزیری ژینگە: لە کابینەی محەمەد شیاع سوودانی (٢٠٢٢-٢٠٢٤).

• ڕاوێژکاری سەرۆکایەتی: بۆ ماوەی ١٧ ساڵ (٢٠٠٥-٢٠٢٢) ڕاوێژکاری هەر سێ سەرۆک کۆماری پێشووی عێراق (جەلال تاڵەبانی، فوئاد مەعسوم و بەرهەم ساڵح) بووە.

• نوێنەرایەتیی نێودەوڵەتی: سەرۆکی شاندی عێراق بووە لە لوتکەی کەشوهەوای (COP28) لە ئیمارات و بەشداری لە (COP21) پاریس و کۆبوونەوەکانی کۆمەڵەی گشتیی نەتەوە یەکگرتووەکان کردووە.

ململانێی پارتی و یەکێتی

دیاریکردنی کاندیدی یەکێتی لە کاتێکدایە کە تا ئێستا ڕێککەوتنێکی کۆتایی لەنێوان یەکێتی و پارتی دیموکراتی کوردستان لەسەر یەک کاندیدی هاوبەش نییە. بەپێی زانیارییەکان، پارتی دیموکراتی کوردستان بە نیازە «فوئاد حوسێن»، وەزیری دەرەوەی ئێستای عێراق وەک کاندیدی خۆی پێشکەش بکات.

بەنگین ڕێکانی، وەزیری ئاوەدانکردنەوەی عێراق ئاماژەی بەوە کردووە کە دانوستانەکانیان لەگەڵ یەکێتی دەکەوێتە دوای پێشکەشکردنی ناوەکان و لە هەوڵدان کۆدەنگییەک دروست بکرێت. هاوکات شێروان دووبەردانی پەرلەمانتاری پارتی ڕایگەیاند کە ئەوان چاوەڕێی یەکێتی بوون کاندیدی خۆی دیاری بکات ئینجا هەڵوێستیان دەبێت. هەر لەم چوارچێوەیەدا، دوێنێ هۆشیار زێباری سەردانی بافڵ تاڵەبانی کردووە لە سلێمانی، کە بەپێی زانیارییەکان پارتی داوای کردووە چەند ناوێک پێشکەش بکرێن بۆ ئەوەی لەسەر یەکێکیان ڕێکبکەوتن بکرێت.

وادەی یاسایی و ڕکابەرەکان

ئەمڕۆ کاتژمێر ٣:٠٠ی پاشنیوەڕۆ دوایین وادە بوو بۆ پێشکەشکردنی سیڤی بۆ پۆستی سەرۆک کۆمار. بەپێی ئامارەکان، زیاتر لە ٤٥ کەس خۆیان بۆ ئەم پۆستە کاندید کردووە. جگە لە کاندیدەکانی پارتی و یەکێتی، یەکگرتووی ئیسلامیی کوردستانیش «د. موسەننا ئەمین»ـی بۆ هەمان پۆست کاندید کردووە.

بەپێی دەستووری عێراق، پەرلەمان ماوەی ٣٠ ڕۆژی لەبەردەمدایە بۆ هەڵبژاردنی سەرۆک کۆماری نوێ دوای داخستنی دەرگای خۆپاڵاوتن، کە بەپێی نەریتی سیاسی پشکی کوردە.