ناڕەزایەتییە جەماوەرییەکان لە شارە جیاوازەکانی ئێران و ڕۆژهەڵاتی کوردستان بەردەوامە و لە چەند ناوچەیەک گرژی و ئاڵۆزی توندی لێکەوتووەتەوە، هاوکات دەسەڵاتداران هەڵمەتی دەستگیرکردنی چالاکوانان و هاووڵاتیانیان چڕتر کردووەتەوە.
بەپێی سەرچاوە مەیدانییەکان، لە شارۆچکەی مەلەکشاهی سەر بە پارێزگای ئیلام، پێکدادانی سەخت لەنێوان خۆپیشاندەران و هێزە ئەمنییەکان ڕوویداوە. ئامارە سەرەتاییەکان ئاماژە بەوە دەکەن کە بەهۆی توندوتیژییەکانەوە ٩ گەنجی کورد گیانیان لەدەستداوە و ٤ کارمەندی هێزە ئەمنییەکان کوژراون. بەهۆی زۆری ژمارەی بریندارەکانەوە، لە بڵندگۆی مزگەوتەکانەوە داوای بەخشینی خوێن لە هاووڵاتیان دەکرێت.
لە تەوەرێکی دیکەدا، ڕێکخراوی مافی مرۆڤی هەنگاو بڵاویکردەوە کە لە ماوەی شەش ڕۆژی ڕابردوودا لانی کەم ١٣٢ هاووڵاتی دەستبەسەرکراون. تەنیا لە چەند ڕۆژی ڕابردوودا ٧٧ کەس دەستگیرکراون کە ٤٥ کەسیان کورد و ٢٣ کەسیان لە پێکهاتەی لوڕن. لەنێو دەستگیرکراوەکاندا ژنان، منداڵان، خوێندکاران و مامۆستایان دەبینرێن. هاوکات لە پارێزگای ئیلام و شارەکانی دێهلوڕان، دەرەشار و ئاودانان ٣٩ هاووڵاتی ڕاپێچی شوێنی نادیار کراون.
لەسەر ئاستی فەرمی، عەلی خامنەیی، ڕێبەری باڵای کۆماری ئیسلامی ئێران لە یەکەم کاردانەوەیدا ڕایگەیاند: «ناڕەزایەتی مافێکی ڕەوایە، بەڵام جیاوازە لە ئاژاوەگێڕی». خامنەیی ئاماژەی بەوە دا کە دەبێت بەرپرسان گوێ لە داواکارییەکان بگرن، بەڵام هۆشداریدا کە قسەکردن لەگەڵ «ئاژاوەگێڕان» بێسوودە. ناوبراو دابەزینی بەهای دراوی وڵاتەکەی و گرانبوونی بازاڕی بە «کاری دوژمن» وەسف کرد.
لە لایەکی دیکەوە، پارتی ژیانی ئازادی کوردستان (پژاک) لە پەیامێکدا پشتیوانی خۆی بۆ خۆپیشاندانەکان دەربڕی و ڕایگەیاند کە «کرماشان دەبێتە چەقی گۆڕانکارییەکان». هەر لە چوارچێوەی پێشێلکارییەکاندا، ڕاپۆرتەکان باس لە دۆخی نالەباری زیندانییەکی سیاسی کورد دەکەن بەناوی محەممەد پەیغامی (٦٠ ساڵ) خەڵکی شنۆ، کە بەهۆی ئەشکەنجەوە تووشی جەڵتەی دڵ بووە و بەبێ ئاگاداری خێزانەکەی نەشتەرگەری بۆ کراوە.