دوای ئەوەی هێزە تایبەتەکانی ئەمریکا نیکۆلاس مادۆرۆ، سەرۆکی ڤەنزوێلایان دەستگیرکرد و گواستیانەوە بۆ ویلایەتە یەکگرتووەکان، دۆخەکە تەنها لە کاراکاسەوە سنوردار نەماوە، بەڵکو گرژییەکی توند لە نێوان واشنتۆن و بۆگۆتا دروست بووە، هاوکات کاردانەوە نێودەوڵەتییەکان بەردەوامییان هەیە.

مادۆرۆ لەبەردەم دادگای مانهاتن

بەپێی زانیاریی میدیا ئەمریکییەکان، مادۆرۆ و هاوسەرەکەی شەوی ڕابردوو لەژێر چاودێرییەکی توندی ئەمنیدا گوازرانەوە بۆ سەنتەری دەستبەسەرکردنی میترۆپۆلیتەن لە برۆکلین. بڕیارە سبەینێ لە دادگای فیدراڵیی مانهاتن بە تۆمەتی «بازرگانیکردن بە ماددە هۆشبەرەکان و چەک» دادگایی بکرێت.

پڵنگەکە خەبەر مەکەرەوە

لەلایەکی دیکەوە، دۆناڵد ترەمپ، سەرۆکی ئەمریکا هێرشی توندی کردە سەر گۆستاڤۆ پێترۆ، سەرۆکی کۆڵۆمبیا و تۆمەتباری کرد بەوەی «کۆکایین بەرهەم دەهێنێت و ڕەوانەی ئەمریکای دەکات». ترەمپ هۆشداریدا کە «هەر کەسێک ئەو کارە بکات، دەبێتە ئامانجی هێرش».

لە وەڵامدا، سەرۆکی کۆڵۆمبیا کە پێشتر ئیدانەی هێرشەکەی سەر ڤەنزوێلای کردبوو، وەڵامێکی توندی دایەوە و وتی: «هەڕەشە لە سەروەریی ئێمە مەکە، چونکە پڵنگەکە خەبەر دەکەیتەوە، هێرشکردنە سەر سەروەریی ئێمە مانای ڕاگەیاندنی جەنگە».

دابەشبوونی نێودەوڵەتی

ڕووداوەکە جیهانی دابەشکردووە:

• ڤەنزوێلا: دێلسی رۆدریگز، سەرۆکی بەوەکالەت ڕایگەیاند ملکەچ نابن و ئامادەی جەنگن بۆ پاراستنی نەوتی وڵاتەکەیان.

• ڕووسیا: نوێنەری ڕووسیا لە نەتەوە یەکگرتووەکان دەستگیرکردنەکەی بە «ڕفاندن» وەسف کرد و بڕیارە سبەینێ ئەنجومەنی ئاسایش لەسەر داوای ئەوان کۆببێتەوە.

• دەم پارتی: پارتی یەکسانی و دیموکراسی گەلان لە بەیاننامەیەکدا هێرشەکەی بە «دەستێوەردانی ئیمپریالیستی» و پێشێلکردنی یاسا نێودەوڵەتییەکان ناوبرد و پشتیوانی بۆ گەلی ڤەنزوێلا دووپات کردەوە.

  ئەم پێشهاتانە ناوچەی ئەمریکای لاتینی خستووەتە بەردەم ئەگەری ئاڵۆزیی زیاتر، بەتایبەت لەگەڵ هەڕەشە ئاشکراکانی نێوان ئەمریکا و وڵاتانی ناوچەکە.