مەسروور بارزانی، سەرۆکی حکومەتی هەرێمی کوردستان، ئەمڕۆ دووشەممە ٢ی شوباتی ٢٠٢٦، لە شاری هەولێر پێشوازی لە بێریڤان ئایماز، جێگری سەرۆکی پەرلەمانی هەرێمی نۆردراین-ڤێستڤاڵنی ئەڵمانیا کرد.
بەگوێرەی ڕاگەیەندراوی حکومەتی هەرێمی کوردستان، لە دیدارەکەدا گفتوگۆ لەسەر پتەوکردنی پەیوەندییەکانی نێوان هەرێمی کوردستان و ئەڵمانیا لە بوارە جیاوازەکاندا کراوە و هەردوولا جەختیان لە گرنگیی بەردەوامی و فراوانکردنی ئەو پەیوەندییانە کردووەتەوە.
لەم دیدارەدا، بێریڤان ئایماز ستایشی ڕۆڵی کاریگەری هەرێمی کوردستانی کرد لە پاراستنی ئاسایش و سەقامگیریی ناوچەکە. ناوبراو بەتایبەتی ئاماژەی بە هەوڵەکانی هەرێمی کوردستان دا لە «هێورکردنەوەی شەڕ و ئاڵۆزییەکانی ئەم دواییەی سووریا» و هەروەها داکۆکیکردن لە مافەکانی گەلی کورد و پێکهاتەکانی دیکەی ئەو وڵاتە، کە بە هەنگاوێکی گرنگ و بەرز نرخێنرا.
هەرێمی نۆردراین-ڤێستڤاڵن یەکێکە لە هەرێمە گرنگەکانی ئەڵمانیا و پەیوەندییەکی دۆستانەی لەگەڵ هەرێمی کوردستان هەیە، ئەم سەردانەش لە چوارچێوەی بەهێزکردنی پەیوەندییە دیپلۆماسی و سیاسییەکانی نێوان هەولێر و بەرلین دێت.