حکومەتی هەرێمی کوردستان نوێترین ئامار و زانیارییەکانی تایبەت بە پەیوەندییە داراییەکانی لەگەڵ حکومەتی فیدراڵ بۆ ساڵانی ٢٠٢٣، ٢٠٢٤ و ٢٠٢٥ بڵاوکردەوە. بەپێی ڕاپۆرتەکە، کەلێنێکی گەورە لە ناردنی شایستە داراییەکانی هەرێمدا هەیە.

لە ماوەی سێ ساڵی ڕابردوودا، کۆی شایستە داراییەکانی هەرێمی کوردستان گەیشتووەتە ٥٨.٣ تریلیۆن دینار، بەڵام حکومەتی عێراق تەنیا ٢٤.٣ تریلیۆن دیناری خەرج کردووە. ئەمەش دەکاتە ڕێژەی ٤١٪ی کۆی شایستەکان و تەنیا ٣.٩٪ی کۆی بودجەی گشتی عێراق. هەروەها ئاماژە بەوە کراوە کە پشکی هەرێم بۆ پڕۆژەکانی وەبەرهێنان «سفر» بووە و هیچ بڕە پارەیەک بۆ ئەو مەبەستە نەنێردراوە.

قەیرانی مووچە

ڕاپۆرتەکە تیشکی خستووەتە سەر دواکەوتنی مووچەی فەرمانبەران و ڕوونی کردووەتەوە کە لەو ماوەیەدا بەغدا پارەی ١٢ مووچەی تەواوی هەرێمی نەناردووە. بەپێی دابەشکاریی ساڵەکان:

• ساڵی ٢٠٢٣: پارەی ٥ مانگ نێردراوە (٣ مووچە ماوە).

• ساڵی ٢٠٢٤: پارەی ١٠ مانگ نێردراوە (١ مووچە ماوە).

• ساڵی ٢٠٢٥: پارەی ١٠ مانگ نێردراوە (٢ مووچە ماوە).

هەناردەی نەوت و داهاتەکان

سەبارەت بە دۆسیەی نەوت، ئامانج ڕەحیم، سکرتێری ئەنجوومەنی وەزیران ڕایگەیاند کە هەرێمی کوردستان پابەند بووە بە ڕێککەوتنەکان و لە سێ مانگی کۆتایی ساڵی ٢٠٢٥دا بڕی ١٩ ملیۆن و ٥٩٤ هەزار بەرمیل نەوتی ڕادەستی کۆمپانیای سۆمۆ کردووە. تێکڕای ڕۆژانە گەیشتووەتە ٢١٨ هەزار بەرمیل و داهاتەکەی بە ١ ملیار و ٢١٥ ملیۆن دۆلار مەزەندە دەکرێت، بە لەبەرچاوگرتنی نرخی ٦٢ دۆلار بۆ هەر بەرمیلێک.

حکومەتی هەرێم ئاماژەی بەوەش داوە کە ڕاگرتنی هەناردەی نەوت لە ماوەی ڕابردوودا زیانی ٢٥ ملیار دۆلاری بە ئابووریی عێراق گەیاندووە.