دیندار زێباری، رێکخەری راسپاردە نێودەوڵەتییەکان لە حکومەتی هەرێمی کوردستان رایگەیاند، هەرێمی کوردستان بەشداریی لە خولی 92ی لیژنەی رێککەوتننامەی نەهێشتنی جیاکاری دژی ئافرەتان (سیداو) دەکات، کە بڕیارە لە ڕۆژانی 2 تا 6ی شوباتی 2026 لە بارەگای نەتەوە یەکگرتووەکان لە جنێڤ بەڕێوە بچێت.
بەگوێرەی لێدوانەکەی رێکخەری راسپاردە نێودەوڵەتییەکان، شاندی حکومەتی هەرێم لە چوارچێوەی شاندی فەرمیی کۆماری عێراقدا بەشدار دەبێت. لە میانەی دانیشتنەکاندا، وتار و راپۆرتی حکومەتی هەرێم سەبارەت بە هەنگاوەکانی جێبەجێکردنی راسپاردەکانی تایبەت بە رێککەوتننامەکە و بەرەوپێشبردنی مافەکانی ژنان دەخوێندرێنەوە.
پلانی هەرێم بۆ مافەکانی مرۆڤ
دیندار زێباری ئاماژەی بەوە کردووە کە لە چوارچێوەی پلانی حکومەتی هەرێم بۆ مافەکانی مرۆڤ (2021–2025)، هەنگاوی جددی نراوە و دەستکەوتی بەرچاو تۆمار کراون. زێباری دەڵێت: «ئەم گفتوگۆیانە دەروازەیەکی گرنگن بۆ نیشاندانی هەنگاوەکانی حکومەتی هەرێمی کوردستان لە پێناو نەهێشتنی هەموو جۆرەکانی جیاکاری و توندوتیژی خێزانی لە چوارچێوەی یاسا و رێنماییەکان».
پێشوازیی نێودەوڵەتی
بەوتەی بەرپرسەکەی حکومەتی هەرێم، لە گفتوگۆکانی پێشوودا کۆمەڵگەی نێودەوڵەتی و ژمارەیەک لە وڵاتان بە دیدێکی ئەرێنییەوە لە هەنگاوەکانی هەرێمی کوردستانیان ڕوانیوە. ئەو پێشوازییە نێودەوڵەتییە بەتایبەتی لە پرسەکانی پاراستنی یەکسانی، هەڵپەساردنی کارکردن بە سزای لەسێدارەدان و میوانداریکردنی ژمارەیەکی زۆری ئاوارە و پەنابەران ڕەنگی داوەتەوە.