وەزارەتی ڕۆشنبیری و لاوانی حکومەتی هەرێمی کوردستان، لە ڕێگەی بەڕێوەبەرایەتیی گشتیی ڕاگەیاندن و چاپ و بڵاوکردنەوە، بڕیارێکی توندی دەرکرد بۆ ڕاگرتنی پەخشی ئەو کەناڵە بیانی و عەرەبییانەی کە لە سیستەمە ناوخۆییەکانی هەرێمی کوردستان پەخش دەکرێن و ناوەڕۆکەکانیان بە «بێڕێزی بەرانبەر نەتەوەی کورد» و «تێکدانی ئاشتەوایی کۆمەڵایەتی» لە قەڵەم دراوە.
بەپێی نووسراوێکی فەرمی کە ئەمڕۆ چوارشەممە، ٢٨ی کانوونی دووەمی ٢٠٢٦ بە واژۆی شێروان عەوڵا خورشید، بەڕێوەبەری گشتیی ڕاگەیاندن دەرچووە و ئاراستەی کۆمپانیاکانی پەخشی (United Mix Media، Live Dream، Family Box، OBOX و نجمة الأعلام) کراوە، داوا کراوە دەستبەجێ پەخشی ئەو کەناڵانە ڕابگیرێت.
هۆکار و بنەمای یاسایی بڕیارەکە
لە نووسراوەکەدا هاتووە کە ئەم بڕیارە پاڵپشتە بە ڕێنمایی ژمارە ١ی ساڵی ٢٠١٤ی تایبەت بە ڕێکخستنی فریکوێنسی سپەیس لە هەرێمی کوردستان. وەزارەت ڕوونی کردووەتەوە کە بەپێی ماددەی ٢ و بڕگەکانی ماددەی ٣ لەو ڕێنماییە، مۆڵەت و فریکوێنسیی ئەو سیستەمانە تەنها بۆ پەخشی کەناڵە ناوخۆییەکان تەرخان کراوە و پەخشکردنی کەناڵە بیانییەکان بەم شێوەیە پێچەوانەی یاسایە.
وەزارەتی ڕۆشنبیری جەختی کردووەتەوە: «پەخشی ئەو کەناڵانە ڕابگرن، بەتایبەتی ئەوانەی کە لە باری ئێستای کوردستاندا بوونەتە هۆکاری پشێوی و تێکدانی ئاشتەوایی کۆمەڵایەتی و بێڕێزیکردن بەرانبەر بە نەتەوەی کورد». ئەمەش وەک ئاماژەیەکە بۆ ڕووماڵی بەشێک لە میدیا عەرەبییەکان سەبارەت بە گرژییەکانی ئەم دواییەی ڕۆژئاوای کوردستان و سووریا، کە تێیدا گوتاری دژ بە هێزە کوردییەکان بەکارهێنراوە.
کاردانەوەی یاسایی و میدیایی
هاوتەریب لەگەڵ بڕیارەکەی وەزارەت، ئەمڕۆ ژمارەیەک لە پارێزەرانی شاری هەولێر سکاڵای یاساییان لە سەرۆکایەتیی داواکاری گشتی تۆمار کرد دژی هەردوو کەناڵی (جەزیرە) و (حەدەس)، بە تۆمەتی هاندانی توندوتیژی و بڵاوکردنەوەی گوتاری ڕق و کینە دژی گەلی کورد. پارێزەر ئاسۆ هاشم ڕایگەیاند کە داوای داخستنی نووسینگەکانی ئەو کەناڵانەیان کردووە لە هەرێمی کوردستان.
لەلایەکی دیکەوە، یەکێتیی میدیای ئازاد و سەندیکای ڕۆژنامەنووسانی کوردستان لە بەیاننامەیەکدا ئیدانەی ئەو ڕۆڵەیان کرد کە هەندێک لە میدیا عەرەبییەکان دەیگێڕن لە «هاندانی کۆمەڵکوژی و بڵاوکردنەوەی فیتنە» دژی پێکهاتەکانی ڕۆژئاوای کوردستان، داواشیان لە ڕۆژنامەنووسان کردووە پابەندی ئیتیکی پیشەیی بن.
بەپێی زانیارییەکان، بەشێک لە کۆمپانیاکان وەک (یونایتد میکس میدیا) پێشوەختە و وەک هەڵوێستێک بەرانبەر بەو میدیایانە، پەخشی چەند کەناڵێکیان ڕاگرتبوو کە بە «ناپیشەیی و دژە کورد» وەسفیان کردبوون.