وتەبێژی بەڕێوەبەرایەتیی نەوت و کانزاکانی سلێمانی ڕایگەیاند، دوای گەیشتنی بڕی پێویست لەو نەوتەی کە لەلایەن حکومەتی عێراقەوە تەرخانکرابوو، سبەی یەکشەممە ١ی شوباتی ٢٠٢٦، دابەشکردنی نەوتی سپی لە سەنتەری شاری سلێمانی دەستپێدەکات.

سەلام عومەر، وتەبێژی بەڕێوەبەرایەتیی نەوت و کانزاکانی سلێمانی ئاماژەی بەوە کرد کە نەوتەکە لە بەنزینخانەکان و لە ڕێگەی کارتی زیرەکەوە دابەش دەکرێت. بەگوێرەی ڕێنماییەکان، هەر خێزانێک بڕی ١٠٠ لیتر نەوتی پێ دەدرێت و لە بەرامبەردا بڕی ٣١ هەزار دینار وەردەگیرێت. سەلام عومەر ڕوونیکردەوە: «سەرەتا لە مەڵبەندی یەک و دووەوە دەست بە دابەشکردنی نەوت دەکرێت».

بەگوێرەی زانیارییەکان، حکومەتی عێراق نزیکەی ٥٠ ملیۆن لیتر نەوتی سپی بۆ هەرێمی کوردستان تەرخان کردووە، کە پشکی پارێزگاکانی سلێمانی و هەڵەبجە لێی نزیکەی ٢٠ ملیۆن لیترە. ئەم بڕیارەش دوای ئەوە دێت کە لە ناوەڕاستی مانگی ڕابردووەوە ناردنی نەوتەکە دەستیپێکردووە.

بەراوردی نرخەکان

ئەم نەوتەی بەغدا لەکاتێکدایە کە پێشتر حکومەتی هەرێم نەوتی بە نرخی ١٠٤ هەزار دینار بۆ هەر بەرمیلێک تەنها لە ناوچە شاخاوییەکان دابەشکردبوو. لە بازاڕەکاندا نرخی بەرمیلێک نەوت لە نێوان ١٧٠ بۆ ١٧٥ هەزار دینار مامەڵەی پێوە دەکرێت، کە ئەمەش جیاوازییەکی زۆری هەیە لەگەڵ ئەو نەوتەی ئێستا بە ٣١ هەزار دینار دابەش دەکرێت.

هاوکات لە هەولێر و دهۆکیش پڕۆسەکە دەستیپێکردووە؛ لە دهۆک تا ئێستا زیاتر لە ١٠ ملیۆن لیتر دابەشکراوە و لە هەولێریش پڕۆسەکە بەردەوامە، هەرچەندە بەهۆی سستی لە گەیشتنی تانکەرەکانەوە دابەشکردنەکە لە هەولێر بە خاوی بەڕێوەدەچێت. بەپێی ئامارەکان، هێشتا زیاتر لە ٤١٥ هەزار خێزان لە هەرێمی کوردستان نەوتیان وەرنەگرتووە.