لێدوانێکی بەرپرسێکی پارتی دیموکراتی کوردستان لە میانەی “دیداری گوڵەخانە” لە کەرکوک، بووە هۆی دروستبوونی گرژی و ئاڵوگۆڕکردنی تۆمەت لەنێوان ئەو حزبە و سێ بەرپرسی پێشووی بزووتنەوەی گۆڕان، لە کاتێکدا ڕەخنەگرانی دیکەش هۆشداری دەدەنە پارتی.
تۆمەتەکەی ٢٠١٤ و وەڵامی توند
لە میانەی دیدارەکەدا، د. محەمەد خورشید، کادری پارتی دیموکراتی کوردستان، ڕووبەڕووی پرسیارێک بووەوە سەبارەت بە نەبوونی یەکڕیزی لەنێوان پارتی و یەکێتی لە کەرکوک و هاوپەیمانیکردن لەگەڵ عەرەبەکان. لە وەڵامدا ناوبراو ئاراستەی قسەکانی گۆڕی و سێ بەرپرسی پێشووی گۆڕان (مەلا فرمان محەمەد، لەتیف فاتح فەرەج و ئەحمەد عەزیز)ی تۆمەتبار کرد بەوەی لە ساڵی ٢٠١٤ سەردانی بارەگای پارتییان کردووە و داوایان کردووە “دژی یەکێتی لێک نزیکببنەوە”.
لە وەڵامدا، ئەو سێ بەرپرسەی پێشووی گۆڕان لە ڕاگەیەندراوێکی هاوبەشدا بە توندی ئەو قسانەیان ڕەتکردەوە و ڕایانگەیاند: “دڵنیاین بەهۆی چونە تەمەنەوە بێت یان گوێ لەمشتی، ئەم کادرە نەک کەس و ڕووداوەکان تێکەڵ دەکات، بەڵکو بۆ هەندێ مەرامی تایبەت لە خەیاڵدا داتاشین دەکات”. ئەوان جەختیان کردەوە کە ئەو کادرەی پارتی لەجیاتی وەڵامدانەوەی پرسیاری یەکڕیزی کورد، خۆی لە بابەتەکە دزیوەتەوە.
هۆشدارییەکەی ڕێبوار کەریم
لەلایەکی دیکەوە، ڕێبوار کەریم، پەرلەمانتاری عێراق لە لێدوانێکدا هێرشی کردە سەر سیاسەتی پارتی و ڕایگەیاند: “ئەوەی ڕێزی گەنجەکانی وڵاتەکەی خۆی نەگرێت، چارەنووسەکەی وەک پارتی دەبێت”. ناوبراو جەختی کردەوە کە کارەکانی بۆ خەڵک بووە و شوێنکەوتەی هیچ کەسێک نییە.
دەنگێک لەناو پارتییەوە بۆ کشانەوە
هاوکات لەگەڵ ئەو ڕەخنانە، جەلال نەریمان بێستانی، کارگێڕی لقی ١٢ی پارتی لە هەڵەبجە، پەیامێکی جیاوازی بڵاوکردەوە و داوای لە سەرکردایەتی حزبەکەی کرد لە پرۆسەی سیاسیی عێراق بکشێنەوە. ناوبراو نووسیویەتی: “عێراقی بۆگەن پێشکەش بە جاش و چڵکاوخۆرەکان بێت”، بەو پاساوەی کە هەڵوێستی نەتەوەیی پارتی بووەتە هۆی ئەوەی عەرەبەکان دژایەتییان بکەن.